Уазджытæ нæ республикæмæ ссыдысты æртыккаг хатт
Евгений Вахтанговы номыл Академион уырыссаг театры цæуынц Михаил Щепкины номыл Белгороды паддзахадон академион театры «Стыр гастрольтæ». Уазджытæ нæ республикæмæ ссыдысты æртыккаг хатт. Фыццаг хатт та нæм уыдысты 2018-æм азы. Ацы хатт сластой хъæлдзæг постановкæтæ. Гастрольтæ цæудзысты 13-æм октябрьмæ. Аивадон изæрты тыххæй бæстондæр радзурдзæн Касаты Наирæ.
Щепкины номыл Белгороды академион театры репертуар ирон аивадуарзджытæн хорз зонгæ у. Республикæмæ йе ртыккаг ссыды труппæ сласта цалдæр спектаклы. Кæд сæхи горæты уавæр хуымæтæг нæу, уæддæр уазджытæ равдисдзысты цардуарзон комедитæ. Гастрольтæ байгом кодтой ирониимæ спектакль «Моя жена лгунья», йе вæрæг-режиссер Сергей Денисов.
Уымæй уæлдай, аивадуарзджыты тæрхонмæ рахæсдзысты Островскийы классикон комеди «Женитьба Бальзаминова». Уый та сæвæрдта Игорь Ткачев. Гастрольтæ дарддæр баххæст кæндзæн францусаг пьесæ «Ужин дураков». Программæйы кæронбæттæн аккорд та суыдзæн спектакль «Абсолютно счастливые люди».
Белгороды æхстытæ кæй цæуы, уый аххосæй ацы аз театр куыста къуылымпытимæ. Кæд дзы æппынæдзух тæссаг у, уæддæр театры ацыдысты дыууæ стыр премьерæйы. Æдæппæтæй та репертуары ис 50 спектаклы. Сæ куысты зын уавæрты тыххæй радзырдта Уæрæсейы адæмон артист Виталий Стариков.
Белгороды академион театры «Стыр гастрольтæ» кæронмæ фæуыдзысты 13-æм октябры. Уый фæстæ труппæ ацæудзæн Рязаньмæ. Гастрольтæ цæуынц федералон программæ «Стыр гастрольтæ» æххæст кæнгæйæ, программæ кусын райдыдта 2014-æм азы. Проекты фæрцы бæстæйы аивадуарзджытæ зонгæ кæнынц уæрæсейаг хуыздæр театрты репертуартимæ. 2022-æм азы гастролон-концертон пъланмæ хаст æрцыдысты Донецкы æмæ Луганскы адæмон республикæты, стæй Херсоны æмæ Запорожьейы облæстты сфæлдыстадон къордтæ.
