Ирыстоны боныхъæды бирæ зайæгойтæ нæ рæстмæ кæнынц, фæлæ оранжереяйы уавæрты уыдонæй алкæцыдæр ратты дыргъ
Мандаринтæ, лимоны алы хуызтæ. Ацы дыргътæ зайынц хæххон паддзахадон аграрон университеты оранжереяйы. Уымæн йæ бындур æвæрд æрцыд 33 азы размæ. Ирыстоны боныхъæды бирæ зайæгойтæ нæ рæстмæ кæнынц. Фæлæ оранжереяйы уавæрты уыдонæй алкæцыдæр ратты дыргъ. Бæстондæр радзурдзæн Чехойты Фатимæ.
Зайæгойтæм куыд зилын хъæуы, бæлæсты къалиутæ куыд лыг кæнын хъæуы. Ацы хабæрттæ хæххон паддзахадон аграрон университеты аграрон факультеты студенткæ Ольга Казаченко базыдта оранжереяйы. Чызг уым кусы фыццæгæм курсæй нырмæ. Йæхæдæг куыд загъта, уымæ гæсгæ зайæгойтæм зилын бауарзта сабийæ. Ныр йе *мкурсонтимæ ам исынц, сæ царды сын æххуыс чи уыдзæн, ахæм фæлтæрддзинад. Ольгæ фæнд кæны йæ зонындзинæдтæ уæрæхдæр кæныныл.
Хæххон Паддзахадон аграрон университеты оранжереяйæ байгом 1991 азы. Йæ бындурæвæрæг уыд профессор Гæздæнты Азан. Уæд дзы ныссагътой зæххы къорийы алы рæттæй ласт зайæгойтæ. Мандаринтæ, лимонтæ, авокадо. Гæздæнты Азан ам цы традицитæ ныффидар кодта, уыдон ныр æххæстгонд цæуынц. Æдзух дзы фæзыны ног цымыдисаг зайæгойтæ. Оранжереяйы хорз æнкъары йæхи лимон Пандероза. Уый у лимон, цитрон æмæ грейпфруты гибрид. Йæ дыргътæ вæййынц стыр. Æмæ йæ уый хицæн кæны лимоны иннæ хуызтæй. Цæгат Ирыстоны боныхъæды æндæр бæстæтæй ласт зайæгойты бирæ хуызтæ нæ рæстмæ кæнынц. Фæлæ оранжереяйы сарæзтой ахæм уавæртæ, æмæ дзы алы бæлас дæр дæтты дыргътæ. Агрохими æмæ дыргъдоны кафедрæйы доцент Хъаныхъуаты Зауырбеджы ныхæстæм гæсгæ, оранжереяйы фаархайынц алы курсыты студенттæ. Уый сын у хорз фæлтæрддзинад.
Тагъд рæстæг ам сæмбырд кæндзысты мандаринтæ æмæ лимонтæ. Ног азы агъоммæ сæ байуардзысты студенттæ æмæ ахуыргæнджытæн. Ног азы райдиан та бавналдзысты бæлæстæм зилынмæ, лыг сын кæндзысты сæ уæлдай къалиутæ. Афтæмæй цæттæгонд уыдзысты фидæны азы хъæздыг тыллæг дæттынмæ.
