Баст уыд Советон Цæдисы адæмон артисткæ Дудараты Вероникæйы номимæ
Уæрæсейы хоры æмæ симфонион æрыгон дирижерты фестиваль-форум кæронмæ æрхæццæ. Баст уыд Советон Цæдисы адæмон артисткæ Дудараты Вероникæйы номимæ. Гала-концерты азæлыдысты уырыссаг композиторты æнæмæлгæ уацмыстæ – Александр Бородины 2-æгæм симфони «Богатырская», стæй Сергей Танеевы кантата «Иоанн Дамаскин». Фестивалы программæмæ гæсгæ ацыдысты концертон æмæ ахуырадон программæтæ. Æртæ бонмæ форумы архайджытæн фадат уыд, дирижерты аивады мэтр Станислав Калинины дæсныйадæвдисæг ахуыртæ бабæрæг кæнынæн. Гала-концерт бабæрæг кодта республикæйы Хицауады Сæрдары хæдивæг Платы Альбинæ. Бакасти арфæйы фыстæг Цæгат Ирыстоны Сæргълæууæг Сергей Меняйлойы номæй, æмæ загъта, ацы фестиваль-форум стыр æвæрæн кæй бахаста нæ бæстæйы музыкалон культурæйы рæзтмæ.
