Ацы хатт аивадуарзджыты зæрдæтæ барухс кæндзысты италиаг классикæйæ
18-æм æнусы астæу Венецийы царды фæзилæнтæ. Тæбæхсæуты Балойы номыл Цæгат Ирыстоны паддзахадон Ирон академион театры цæттæ кæнынц радон премьерæмæ. Ацы хатт аивадуарзджыты зæрдæтæ барухс кæндзысты италиаг классикæйæ. Карло Гольдонийы пьесæ «Фæлывд»-мæ гæсгæ æвæрд спектакль фенæн уыдзæн 22-æм æмæ 23-æм мартъийы. Куыд цæуынц цæттæгæнæн мадзæлттæ, уый тыххæй радзурдзæн Чехойты Фатимæ.
Æрыгон фæлитой Лелио Венецийы 18 æнусы хъæлдзæг цардмæ бахаста ног хахуыртæ. Ирон театры артисттæ цæттæ кæнынц италиаг классик Карло Гольдонийы комеди «Фæлывд»-мæ гæсгæ спектаклы премьерæ.
Хæрзконд æмæ арæхстджын фæлитой у сæйраг хъайтар. Ахæм миниуджытæй йæ баххæст кодта драматург – Ренессансы дуджы италиаг театры реформатор. Йæхицæн кадджын ном æрхъуыды кæнгæйæ, зæрдæмæдзæугæ æмæ уарзæгой Лелио сайы æгъдауджын æмæ уæздан венецийæгты.
Лелиойы фарсмæ – йæ фæсдзæуин. Уый дæр йæ хицауы хуызæн – фæлитой. Кæд сæйраг хъайтар йæхи дохтыры чызджытæ Баланцони, Беатриче æмæ Розауруйæн бауарзын кодта, уæд Арлекин та йæхиуыл æфснайæг Коломбинæйы æрæууæндын кодта. Фæлæ сайд, æнæмæнг, раргом уыдзæн.
Царды басусæг кæнæн ницæмæн ис, алцыдæр рабæрæг вæййы. Венецийæгты хабæрттæ куыд рауайдзысты, уый базонæн уыдзæн сабаты æмæ хуыцаубоны. Театруарзджытæн спектакль «Фæлывд» фенæн æмæ йын аргъ скæнæн уыдзæн 22-æм æмæ 23-æм мартъийы.
