Ног сфæлдыстадон тыгъдад фæзындзæн республикæйы аивæдты лицейы Дзæуджыхъæуы
Креативон индустрияты скъола цæттæ кæны йæ байгом кæнынмæ. Ног сфæлдыстадон тыгъдад фæзындзæн республикæйы аивæдты лицейы Дзæуджыхъæуы. Уым кусдзысты 4 къабазмæ гæсгæ: дизайны студи, фото æмæ видео æрмæджытæ исын, звукорежиссеры студи, стæй нырыккон электрон музыкæ. Ныртæккæ кæронмæ фæхæццæ кæны бæстыхæйтты цалцæг. Ног къуыри та кабинеттæ ифтонг кæндзысты æмбæлгæ кусæнгæрзтæй. Уæлæмхасæн ахуырады хуызы скъолайы ахуыр кæныны фадат уыдзæн 5-æмæй 11-æм кълæсты онг ахуырдзаутæн. Ам æнхъæлмæ кæсынц республикæйы æппæт ахуыргæнæндæттæй сывæллæттæм.
Нæ бæстæйы проект æххæст кæнынц 2020-æм азæй фæстæмæ, федералон программæ «Аивад æмæ сфæлдыстады рæзт»-ы фæлгæты. Цæгат Ирыстоны уый у креативон индустрияты фыццаг скъола. Йæ саразджытæ куыд зæгъынц, афтæмæй аивæдты лицейы фарс рахæцыдысты федералон æмвæзадыл. Цæттæгæнæн мадзæлтты къæпхæнтæ бахастой фæндаггон картæмæ, æмæ сæм бæстон цæстдард цыди Уæрæсейы культурæйы министрады рдыгæй. Æххуыс райстой регионалон ведомствойæ дæр.
