Æрхъуыдыгонд цаумæ гæсгæ, Æрыдоны районы хæдзарадтæй иуы вирус рабæрæг родмæ
Цæгат Ирыстоны уыд ведомствæты *хсæн стыр ахуыртæ фадниз куынæг кæныны фæдыл. Æрхъуыдыгонд цаумæ гæсгæ, Æрыдоны районы хæдзарадтæй иуы вирус рабæрæг родмæ. Специалисттæ сæххæст кодтой мадзæлтты комплекс. Ахсджиаг у, системæмæ гæсгæ вакцинацийы æмæ профилактикон куысты фæрцы, фæстаг 20 азмæ тæссаг вирус республикæйы нысангонд нæ уыд. Уыимæ Уæрæсейы алы регионты цалдæр азы размæ æмæ ацы аз дæр фадниз рабæрæг. Бæлвырддæр радзурдзæн Хъайтмазты Дзерассæ.
Æрхъуыдыгонд цаумæ гæсгæ, Æрыдоны районы хæдзарадтæй иуы род фæрынчын. Тæфсæг, зын улæфт, цæстытæ рæсыд, рафаст – цæрæгоймæ рабæрæг сты фаднизы æппæт миниуджытæ. Дарддæр куыст инструкцимæ гæсгæ: районы ветеринарон станцæйы специалисттæ рацыдысты хæдзарадмæ. Нысан кæнынц тæссаг бынаты арæнтæ, æвæрынц дезинфекцион гауызтæ æмæ табличкæ «карантин».
Мæргъиты Дианæ у Æрыдоны районы станцæйы сæйраг эпизоотОлог, ахуырты та – рынчын цæрæгойы хицау. Куыд зæгъы, афтæмæй ахсджиаг у, ма бауадзын низ апарахат кæнын. Специалисттæ архайынц сæрмагонд костюмты. Бынаты æдзух бакусынц дезинфекцион таддагæй. Кæронбæттæн хатдзæг скæнын у æрмæст лабораторийы кусджыты бон.
Анализтæ равдыстой, родмæ кæй ис фаднизы вирус. Уый та, æрмæст хæдзарады карантин нæ нысан кæны, æппæт районмæ дæр хъæуы сæрмагонд цæстдард. Фæндæгтыл сæвæрынц дезинфекцион бырутæ æмæ шлагбаумтæ. Бæлвырд кæнынц, уый фæстæ та вакцинаци кæнынц тæссаг бынаты æппæт стурвос. Низ кæуыл бахæцыд, уыцы цæрæгойты скуынæг кæнынц. Хицæуттæн бафидынц компенсаци. Хъуылымбегты Игорь у ветеринарон дохтыр. Йæ ныхæстæм гæсгæ, йе мкусджытимæ ахуырты цы зонындзинæдтыл бакусынц, уыдон сæ практикæйыл иу хатт дæр нæма бахъуыдысты, фæлæ хъæуы алцæмæдæр цæттæ уæвын.
Ведомствæты хсæн ахæм ахуыртæ вæййынц рæстæгæй-рæстæгмæ. Бакусынц, æрмæст фадниз нæ, фæлæ цæрæгойты æндæр инфекцион низтæм гæсгæ дæр.
Командон-штабон ахуыртæ кæндзысты дарддæр дæр. Цæгат Ирыстоны ис стурвос 93 мин сæры бæрц, лыстæг фос та – 77 минæй фылдæр. Ахсджиаг у хъуыды кæнын, се нæниздзинад æрмæст специалистты афойнадыл архайдæй аразгæ нæу, фæлæ сæ хицæуттæй дæр.
