Ахæм уынаффæ хаст æрцыди æхсæнадон организацийы разамынды хъæппæрисæй
Цæгат Ирыстоны журналистты Цæдис снысан кодта æрвылазон преми «Рухстауæг». Ахæм уынаффæ хаст æрцыди æхсæнадон организацийы разамынды хъæппæрисæй. Фыццаг премийы лауреат сси Дзæуджыхъæуы кадджын гражданин, Уæрæсейы сгуыхт ахуыргæнæг, Сосетон Цæдисы паддзахадон премийы лауреат Биазырты Валентинæ. Дыккаг æмæ æртыккаг преми аккаг систы Уæрæсейы культурæйы сгуыхт кусæг, Цæгат æмæ Хуссар Ирыстоны сгуыхт журналист, информацион агентад «Иринформ»-ы бындурæвæрæг Таболты Иринæ æмæ Мæздæджы районы газет «Моздокский вестник»- директор æмæ сæйраг редактор, Уæрæсейы фысджыты æмæ журналистты Цæдисты уæнг Сергей Телевной. Алы преми дæр æххæстгонд уыдзæни æхцайы фæрæзтæй. Ратдзысты йæ хæстæгдæр рæстæг.
