Сæ иумæйаг куыст арæзт уыдзæн фæсивæды культурон хъомысы рæзтмæ, дæсныйадæвдисæг ахуыртæ аразынмæ, педагогты фæлтæрддзинад фылдæр кæнынмæ
Чайковскийы номыл Дзæуджыхъæуы 1-æм музыкалон скъола бадзырд бафыста горæт Химкийы сывæллæтты аивæдты Центрон скъолаимæ. Сæ иумæйаг куыст арæзт уыдзæн фæсивæды культурон хъомысы рæзтмæ, дæсныйадæвдисæг ахуыртæ аразынмæ, педагогты фæлтæрддзинад фылдæр кæнынмæ, стæй курдиатджын сывæллæтты егъау конкурстæм æмæ фестивальтæм цæттæ кæнынмæ. Æмгуыстады фæлгæты фыццаг мадзал уыдзын Химкæты скъоладзауты балц Дзæуджыхъæумæ. Фæсивæд нæм канд уазæгуаты не ссæудзысты, фæлæ ма архайдзысты æвзонг музыкантты XXII Æппæтадæмон конкурсы «Наши Надежды». Ацæудзæн Дзæуджыхъæуы уалдзæджы. Зæгъын хъæуы уый, æмæ Чайковскийы номыл скъола рагæй æмгуыстад кæны нæ бæстæйы музыкалон ахуыргæнæндæттимæ. Фæлæ официалон бадзырд фыст æрцыд фыццаг хатт. Дыууæ скъолайы дæр сты Уæрæсейы сывæллæтты хуыздæр ахуыргæнæндæтты хыгъды.
