Иу мæймæ базыдтой дæсгай уацмыстæ, рацыдысты нæ бæстæйы сæйраг сценæтæм æмæ азарыдысты зындгонд музыканттимæ
Цæгат Ирыстоны 9 æвзонг музыканты архайынц æппæтуæрæсеон фестиваль «Белый пароход»-ы. Иу мæймæ базыдтой дæсгай уацмыстæ, рацыдысты нæ бæстæйы сæйраг сценæтæм æмæ азарыдысты зындгонд музыканттимæ. Се нкъарæнты тыххæй радзырдтой не сфæлдыстадон къордæн. Бæлвырддæр хабæрттæ радзурдзæн Хъайтмазты Дзерассæ.
Æрмæст 2 къуырийы уарзон Ирыстоны, æмæ та ныр цæттæ сты ног сфæлдыстадон сгуыхтдзинæдтæм. 14 бонмæ кæрæдзийы æрæмысыдысты, кæд æмæ нырма 2 мæйы размæ базонгæ сты, уæддæр. Ныртæккæ сæмбæлдысты, цæмæй та ногæй иумæ зарой.
Афтæ иумæ зарын сахуыр сты сывæллæтты æппæтуæрæсеон музыкалон фестиваль «Белый пароход»-ы. Мæй цардысты Мæскуыйы бынмæ 200 архайæджы хыгъды. Урочыты æмæ алыхуызон дæсныйадæвдисæг ахуырты хуыздæр кодтой сæ вокалон арæхстдзинад. Цæгат Ирыстоны командæйы уыд 9 адæймаджы. Се ппæт дæр сты республикæйы алы музыкалон скъолаты хъомылгæнинæгтæ. Ацыдысты конкурсон æвзæрст.
Сфæлдыстадон рады интенсивы рæстæг архайджытæ бацæттæ кодтой 30 уацмысы. Ныридæгæн сæ равдыстой бæстæйы 3 легендарон сценæйы. Хоры хыгъды сывæллæттæ маэстро Гергиты Валериимæ уыдысты Мæскуыйы Стыр театры æмæ Санкт-Петербурджы Мариинаг театры, стæй Мариинаг театры филиалы Владивостокы экономикон форум æхгæныны мадзалы.
Фестиваль «Белый пароход» цæуы ныр 21-æм хатт, Цæгат Ирыстонмæ та курдиатджын сывæллæтты æркастмæ мадзаларазджытæ ссыдысты 2-аг хатт.
Фестиваль «Белый пароход»-ы фæзы æвзонг музыканттæн уыд, сæ курдиат дзыллæттæм рахæссыны гæнæн. Ацы мадзал ма сын балæвар кодта ног хæлæртты. Сæйрагдæр та бамбæрстой, сæ фидæн вокалимæ сбæттын кæй фæнды, уый.
