Фылдæр пырхгонд æрцыдысты нартхоры хуымтæ
2 мин гектары бæрц хъæууонхæдзарадон хуымзæххытæ хъыгдард баййæфтой, ивгъуыд фæлладуадзæн бонты цы их æруарыд, уый фæстæ. Фылдæр пырхгонд æрцыдысты нартхоры хуымтæ. Сæрмагондæй ныхас цæуы Горæтгæрон, Рахизфарсы æмæ Æрыдоны районты быдыртыл. Экспертон къамис бæрæг кæны, æрдзон фыдбылыз цы зиан æрхаста, уый. Хъæууон хæдзарады министры хæдивæг Къадзаты Игорь куыд загъта, афтæмæй закъонмæ гæсгæ компенсаци райсын сæ бон суыдзæн, сæ хуымтæ чи бафæдзæхста, уыцы хæдзарадтæн. Ныхасы бар нæ уацхæссæг Гæджиты Сосланæн.
Бигъаты Сафарбег ныр дæр йæхимæ нæма рцыд. Йæ куыстуаты быдыртæй хъыгдард баййæфтой нартхоры 200 гектары онг.
Нартхор æм хорз æрзад, – зæгъы фермер. Æрдзон фыдбылыз та йын зиан æрхаста 35 милуан сомæй фылдæрæн. Æмæ уый, быдыртæ æфснайыны хæрдзтæ нæ нымайгæйæ. Ахæм уавæры сты сыхаг хуымзæххытæ дæр. Зæгъæм сойæ кæм уыди, уым ацы аз ницыуал æрзайдзæн. Сахатæй къаддæр рæстæгмæ тæрккъæвдатæ, их æмæ тыхджын дымгæимæ ныппырх кодтой нæ республикæйы быдырты 2 мин гектарæй. Уыдон дæр сты рагагъоммæ нымæцтæ.
Æрдзон фыдбылызы цас зиан æрхаста, уый бæлвырд сбæрæг кæндзæн экспертон къамис. Специалисттæ Цæгат Ирыстоны хъæууон хæдзарады министры хæдивæг Къадзаты Игоримæ ныртæккæ бæрæг кæнынц республикæйы хуымзæххыты уавæр. Къамисы уæнгты хатдзæгтæм гæсгæ, хъуыддаг у зæрдæхсаинаг.
Ныртæккæ ахсджиаг у базонын, хъæууонхæдзарадон зæххытæ фæдзæхст уыдысты, æви нæ, уый, – зæгъынц эксперттæ. Йæхи рдыгæй Цæгат Ирыстоны профилон министрад бацархайдзæн фермертæн баххуыс кæныныл. Бæстон куыст бакæндзысты, тыллæг сисын кæмæй нал бантысдзæн, уыцы быдыртæ бафснайыны хъуыддаджы.
