Ноджыдæр ма 2 хореографион къордæн «Заманхъул»-æн æмæ «Беслæны æвзонгдзинад»-æн саккаг кодтой конкурсы 2-аг бынæттæ
Адæмон кафты ансамбль «Ирон» бацахста 1-аг бынат æппæтадæмон конкурс «Евразийы курдиæтты» Налцыччы. Æвзонг артисттæ Беслæнæй сæ кафæн арæхстдзинад равдыстой кæстæр кары категорийы. Ноджыдæр ма 2 хореографион къордæн «Заманхъул»-æн æмæ «Беслæны æвзонгдзинад»-æн саккаг кодтой конкурсы 2-аг бынæттæ. 3 къордæн дæр разамынд дæтты Цæгат Ирыстоны адæмон артист Дудиаты Олег. Бæлвырддæр радзурдзæн Хъайтмазты Дзерассæ.
Æппæт амындтытæ зæрдыл даргæйæ æмæ разамонæгмæ хъусгæйæ. Ацы 3 къорды ирон кæфтытæ æрмæст афтæмæй кафынц. Хистæр кары сывæллæттæ дæр, æмæ сабитæ дæр æнкъарынц, ацы хъуыддаг куыд бæрнон у, æмæ дисциплинæ куыд ахсджиаг у, уый. Фестивалы æвзонг артисттæ равдыстой, бирæ рæстæг цæуыл ахуыр кодтой, уый. Хæрзиуджытимæ райстой, ферох кæнын кæмæн нæй, ахæм æнкъарæнтæ.
Налцыккæй призон бынæттимæ сыздæхтысты 3 къорды – «Ирон», «Беслæны æвзонгдзинад» æмæ «Заманхъул». Иумæйаг коллекци фæхъæздыгдæр кодтой 2 æвзист æмæ иу сыгъзæрин хæрзиуæгæй. Сывæллæттæ куыд зæгъынц, афтæмæй ахæм хатдзæгтæ сæ къухы кæй бафтдзæн, уый æнхъæл нæ уыдысты. Уый сын бантыст æппынæдзух репетициты æмæ сæ хорз разамонæджы фæрцы.
Зæрдæхæлар ахастдзинад æвдисын, уыимæ дисциплинæйы тыххæй ма рох кæнын. Ноджыдæр ма хъæуы зонын алы сывæллонимæ дæр сæрмагондæй кусын. Дудиаты Олегæн уыдон сты йæ куысты сæйраг æгъдæуттæ. Йæ ныхæстæм гæсгæ, афтæмæй ис схъомыл кæнын æцæг артистты.
Ахæм хуызы куысты хатдзæгтæ систы уæлахизтæ. Сывæллæтæй бирæтæн æппæтадæмон конкурсы архайд сси дебютон. Æмæ сæм кæд фæлтæрддзинад нæй, æмæ мæт кодтой, уæддæр сæ кафтыл уый нæ фæзынд. Сæ курдиатæй æмæ арæхстдзинадæй тæрхонгæнджыты зæрдæтæм фæндаг ссардтой.
Ууыл æвзонг артисттæ не *рлæудзысты. Разæй сæм бирæ уæлахизтæ æнхъæлмæ кæсы. Сæйрагдæр у, дарддæр хиуыл кусын æмæ ног бæрзæндтæм тырнын.
