Ахуыргæнæндоны кады фæйнæджы Светланæйы къам фæзынд рагагъоммæ
Советон Цæдисы адæмон артисткæ, зындгонд балеринæ Адырхаты Светланæ, Цæгат Ирыстонмæ балцы программæмæ гæсгæ, бабæрæг кодта Дзæуджыхъæуы аивæдты лицей. Ахуыргæнæндоны кады фæйнæджы Светланæйы къам фæзынд рагагъоммæ. Фойейы та йыл сæмбæлдысты æвзонг балеринæтæ æмæ зарæггæнджыты къорд. Адæмон артисткæ сæм уазæгуаты æрбацæудзæн, уый сын уыди æнæнхъæлæджы, фæлæ æхсызгон лæвар. Уый кадæн аивæдты лицейы байгом кодтой хореографион кълас. Амæй фæстæмæ хæсдзæн Адырхаты Светланæйы ном. Лицейы хъомылгæнинæгтæ кадджын уазджытæн равдыстой класс-концерты иу хай. Зындгонд балеринæ куыд бафиппайдта, афтæмæй ахæм аивадон ахуыргæнæндæтты рабæрæг вæййынц æвзонг курдиæттæ. Æмæ цæмæй фидæны сæ курдиат парахатдæр кæна, уый тыххæй хъæуы æнæрынцойæ кусын. Уыимæ куыд сывæллæтты, афтæ сæ педагогты дæр.
