Оперæ æмæ Балеты театры сценæмæ рацыд Стыр театры труппæ
Адырхаты Светланæйы юбилейон изæр Дзæуджыхъæуы арæзт æрцыд ивгъуыд фæлладуадзæн бонты. Оперæ æмæ Балеты театры сценæмæ рацыд Стыр театры труппæ. Артисттæ аивадуарзджыты размæ рахастой, зындгонд балеринæйы карьерæйы æппæтæй ахсджиагдæр партитæй сценæтæ. Се *хсæн «Щелкунчик», «Лебединое озеро», «Дон-Кихот», «Пахита». Бæлвырддæр хабæрттæ радзурдзæн Хъайтмазты Дзерассæ.
Алы фезмæлд дæр рог æмæ æнцон. Уый у стыр фыдæбоны хатдзæг. Æнæ уымæй гæнæн нæй. Алцыдæр хъуамæ уа иттæг хорз. Афтæ йæ бон у, балет чи уарзы, уымæн. Ацы репитици Стыр театры балетон труппæйæн хуымæтæг нæу. Артисттæ цæттæ кæнынц ирон аивадуарзджыты размæ рацæуынмæ, Адырхаты Светланæ кæм райгуырд, уыцы зæххыл.
Хæрзконд, гуырвидауц æмæ йæ адæмæн уарзон. Йæ чысыл Райгуырæн зæххыл Адырхаты Светланæмæ куыд æнхъæлмæ кæсынц, æмæ йын цы аргъ кæнынц, уый концерты фыццаг минутæй дæр бæрæг у. Аивадуарзджыты къухæмдзæгъд цалдæр минуты не рлæууыд.
Йæ алы юбилей дæр зындгонд прима-балерина фæдзуры, фыццаджыдæр, æй кæй фæнды йæ райгуырæн зæхмæ ссæуын æмæ бæрæгбон сбæрæг кæнын æнæмæнг ам. Нырма сывæллонæй кæм бамбæрста, балет йæ цард кæй у, уым. Аивадмæ йе *гæрон уарзондзинад ныр йæ кафты не вдисы, йæ курдиат æнæвгъауæй лæвар кæны йæ ахуырдзаутæн. Мæт сыл кæны, куыд хи сывæллæттыл, афтæ. Æмæ сын кæд сæ алы змæлд дæр бирæ хæттыты федта, уæддæр сæ йæ цæст иу уысм дæр нæ исы. Цыма залы нæй, фæлæ сценæйы, æмæ йæ ахуырдзаутæн амоны кафт арфдæр скæнын куыд хъæуы, уый.
Æгæрон курдиат æмæ хъæздыг удварн. Адырхаты Светланæ у, стыр стъалы суæвын æмæ уыимæ хуымæтæг адæймагæй баззайын куыд ис, уый дæнцæг. Йæ цардвæндаг у цымыдисаг истори – йæ бæллицтæ сæххæст кæмæн бантыст, æмæ йæ адæм сæрыстыр кæмæй сты, уыцы гыццыл чызджы истори.
