Культурон бынты нысаниуæг кæмæн ис, уыцы цыртдзæвæн лæууы ныр 9 æнусы.
Æрæфы районы Уæхъæцы райдыдтой реставрацион куыстытæ. Культурон бынты нысаниуæг кæмæн ис, уыцы цыртдзæвæн лæууы ныр 9 æнусы. Уыцы рæстæгмæ æрмæст адæмæн нæ лæггад кодта, фæлæ ма бафæрæзта зæххынкъуыстытæн æмæ зынгсирвæзтытæн дæр. Ныр æй райдыдтой реставраци кæнын. Куыстытæ цæуынц Аланийыл саргъуыды 1100 азы фæлгæты. Бæлвырддæр радзурдзæн Сосранты Жаннæ.
Къултæ цы дуртæй конд сты, уыдон сырх хуыз райстой, æрæджы дзы цы зынгсирвæзт уыд, уый фæстæ. Уыимæ ма зæххæнкъуыстæн, стæй дымгæ æмæ карз уарынтæй фæразон разынд Æрæфы районы Уæхъæцы хъæуы цы мæсыг ис, уый. Ныр реставратортæ бавнæлдтой комы дурын «Хъахъхъæныджы» ирвæзын кæнæн куыстытæм. Ахуыргæндтæ куыд зæгъынц, афтæмæй йыл цæуы 9 æнусы бæрц.
Фыццаг къæпхæны куыстытæм хаст цæуынц зæххы куыстытæ. Мæсыг къахынц йæ раздæры æмвæзадмæ гæсгæ. Дыккаг къæпхæны та йын бавналдзысты йæ хуылф сыгъдæг кæнынмæ. Уæлдай зындæр куыстытæ бакæнын хъæудзæн рудзгуыты цалцæгыл.
Ацы мыггаджы мæсыг, иуæй-иу бæрæггæнæнтæм гæсгæ, фыццаг уыд Останты мыггаджы, уый фæстæ Цакъоты, стæй Тугъанты. Хицæн кæны рудзгуыты цур дуртыл дзуæртты лыггæнттæй. Арæзтадыл кæд бирæ азтæ цæуы, уæддæр йæ цæстахадæн хуыз æмæ декоротивон элементтæ нæ фæцудыдтой, нæ фехæлдысты.
Мæсыг хъуамæ йæ хуыз равдиса фæззæгмæ. Рестовраторты ныхæстæм гæсгæ, уæдмæ хъуамæ куыст фæуой бæстыхайыл. Уый сæ уырны сæ архайды фæрцы ма мæсыг ноджы фылдæр кæй фæцæрдзæн, ноджы фылдæр фæлтæртæн суыдзæн историйы хæссæг.
