Концертон программæ афтæ арæзт уыд, цæмæй студентты гæнæнтæ æвдыст цæуой алы къабæзт
Уæрæсейы æнгомдзинад равдисын, адæмыхæттытæ баиу кæнын, алкæйы культурæ æмæ æгъдæуттæн кад кæнын. Ахæм хæс сæ размæ сæвæрдтой республикæйы культуæрйы колледжы рауагъдонтæ. Ацы бонты радтой дзуапдæттæн концерт. Тæбæхсæуты Балойы номыл Ирон академион театры къух бакæнæн нæ уыд. Концертон программæ арæзт уыд афтæ, цæмæй равдисой алы студентты алывæрсыгдзинад. Уæлдай æргом азæдхтой адæмон хореографимæ. Хъайтмазты Дзерассæ радзурдзæн бæлвырддæр.
Аивадон изæр байгом кодта симд – ирон кæфтытæн сæ ахсджиагдæртæй иу. Равзæры дзы иудзинад, алы змæлды бæлвырддзинад æмæ тых. Ансамбль «Амонд»-ы æрвылазон дзуаппдæттæн концерт сæмбырд кæны иу сценæйы культурæйы республикон колледжы студентты æмæ сын свæййы ахуырадон азы сæйраг хатдзæг.
Концертон программæ афтæ арæзт уыд, цæмæй студентты гæнæнтæ æвдыст цæуой алы къабæзты. Классикон уацмысты фæстæ сценæ байдзаг ирд хуызтæй æмæ энергийæ. Дард Бразилийы ритмтæ апарахат сты залы. Аивадуарзджыты цæст ныр ахсы бынтон æндæрхуызон пластикæ.
Программæйы хицæн бынат ахсы адæмон хореографи. Сæрмагондæй уый хъахъхъæны традицитæ. Сценæйы – кавказаг æмæ хъазахъхъаг кæфтытæ. Алкæцыйæн дæр – йæхи ритм æмæ интонаци. Сæ фæрцы æвдыст цæуы культурæ. Колледж ахадгæйæ æмгуыстад кæны алы регионтæй æмæ бæстæтæй хореографтимæ. Уый фæрцы парахатдæр кæнынц студентты профессионалон гæнæнтæ æмæ æдзух ног кæны репертуар.
Концерты архайдта 50 студентæй фылдæр – æрмæст рауагъдонтæ нæ, фæлæ алы курсты ахуырдзаутæ. Алкæмæндæр уый у афæдзы стыр куысты хатдзæг. Фæскулисæты алцыдæр æндæрхуызон у. Ам нæй къухæмдзæгъд – æрмæст концентраци. Алы азмæлд дæр бæлвырдгонд у, фæлæ сæрмагондæй ныр хъæуы æппæт тыхтæ бамбырд кæнын. Аивадуарзæг сценæйыл æрмæст цалдæр минуты фены, уыдоны фæстæ та ис бирæ сахатты репетицитæ æмæ стыр куыст. Ацы изæр уæлдай ахсджиаг у рауагъдонтæн. Фæстейы баззадысты – ахуыры азтæ, разæй сæм æнхъæлмæ кæсы – профессионалон сценæ æмæ йæм цæттæ сты.
Абон колледжы студенттæ æмæ рауагъдонтæ арæхдæр рацæуынц стыр сфæлдыстадон фæзтæм. Бирæтæ сæ ныридæгæн рахызтысты Мариинаг театры филиалы сценæмæ. Уый æрмæст студенттæн сæхи куысты хатдзæг нæу, фæлæ ма колледжы разамынды, стæй сын зонындзинæдтæ, фæлтæрддзинад æмæ профессионалон рæзтæн гæнæнтæ чи дæтты, уыцы педагогты.
Дзуаппдæттæн концерт хатдзæгтæ кæны æмæ ма уыцы иу рæстæг гом кæны ног сыф. Рауагъдонтæ ныр ацы сценæйæ дарддæр æвдисдзысты, цæуыл сахуыр сты, уый æмæ афтæмæй хæццæ кæндзысты сæ уарзон ахуыргæнæндоны традицитæ.
