Уыд Махъоты Ацæмæзы номыл музыкалон скъолайы ахуырдзаутимæ иумæйаг концерт
Беслæны культурæйы Галуаны арæзт æрцыд паддзахадон филармонийы симфонион оркестры концерт. Фæлæ хуымæтæг фембæлд нæ уыд. Уыд Махъоты Ацæмæзы номыл музыкалон скъолайы ахуырдзаутимæ иумæйаг концерт. Азæлыдысты ирыстойнаг, уæрæсейаг æмæ фæсарæйнаг композиторты хуыздæр уацмыстæ. Дирижеры пульты уæлхъус Махъоты Ацæмæз йæхæдæг. Репетицитæ кодтой æртæ мæйы дæргъы. Раздæр уал концертон программæ равдыстой Дзæуджыхъæуы. Финал та уыдзæн – Махъоты Ацæмæзы номыл музыкалон скъола байгом кæныны кадджын мадзалы. Йæ ахуыргæнинæгты æнтыстдзинæдтæ ныридæгæн дæр дисы æфтауынц. Сæдæ лæппу æмæ чызгæй фылдæр систы æппæтадæмон, æппæтуæрæсеон æмæ регионалон конкурсты лауреаттæ æмæ дипломанттæ.
