Разамынд ын дæтты хицауады сæрдары фыццаг хæдивæг Сæбæтхъуаты Æхсарбег
Битарты Вячеславы хæслæвæрдмæ гæсгæ республикæйы сарæзтой кæсагдарыны къабазы райрæзты кусæг къорд. Разамынд ын дæтты хицауады сæрдары фыццаг хæдивæг Сæбæтхъуаты Æхсарбег. Йæ фыццаг æмбырды архайдтой хъæууон хæдзарады министр Уазиты Хъазыбег, хъæууонхæдзарадон управленийы разамонæг Къадзаты Игорь æмæ муниципалитетты сæргълæууджытæ. Архайджытæ сбæрæг кодтой Цæгат Ирыстоны кæсагдарыны къабазы райрæзты стратеги. Куыд бафиппайдтой, афтæмæй нæ республикæйы ис хорз гæнæнтæ индустриалон аквакультурæйæн. Йæ фæрцы бынæттон фæлхасгæнджытæм хæццæ кæндзысты балер кæсаг, кæф æмæ æндæртæ. Нæ республикæйы ис хорз уавæртæ кæсагдарынæн — бирæ цæугæдæттæ, цадтæ, суадæттæ, стæй уæлдæфы æмбæлгæ температурæ. Профилон ведомствойы бæрæггæнæнтæм гæсгæ ныртæккæ Цæгат Ирыстоны кусынц 13 кæсагдарæг куыстуаты. Уыдонæй 10 архайынц индустриалон аквакультурæйы. Сæбæтхъуаты Æхсарбег куыд загъта, афтæмæй фыццаградон нысан у экологон æдасдзинад сæххæст кæнын, холыйы базæ саразын æмæ профилон куыстуæтты номхыгъд фæуæрæхдæр кæнын. Уымæн та хорз фæрæз уаид специалистты æххуыс æппæт къæпхæнты.
Æмбырды равдыстой Цæгат Ирыстоны индустриалон аквакультурæйы куыстуæттæ саразыны программæйы проект æмæ йæм бахастой цалдæр азы иртæстытæ. Программæйы цы мадзæлттæ ис, уыдоны фæрцы сбæрæг кæндзысты, нæ республикæйы кæсагдарынæн хуыздæр уавæртæ кæм ис, уыцы районтæ. Проект арвыстой Уæрæсейы кæсагдарынады службæмæ æмæ йæ уым æрцыд фидаргонд. Сæбæтхъуаты Æхсарбег куыд бафиппайдта, афтæмæй программæйы архайдзæнис республикæйы алы муниципалитет дæр.
