У æппæтадæмон конкурсты лауреат, Стыр театры Покровскийы номыл камерон сценæйы солист
Зæрдæмæдзæугæ тембр æмæ темперамент, рæсугъд зарджытæ. Дзæуджыхъæуы, Мариинаг театры филиалы арæзт æрцыд Дулаты Дзамболаты фыццаг хицæн концерт. У æппæтадæмон конкурсты лауреат, Стыр театры Покровскийы номыл камерон сценæйы солист. Фыццаг минуттæй фæстæмæ фæндаг ссардта бæрзонд аивадуарзджыты зæрдæтæм. Азарыд зындгонд уырыссаг романстæ. Концерты сфæлдыстадон æнкъарæнты тыххæй бæстондæр радзурдзæн Фидараты Маринæ.
Романс «Гори, гори, моя звезда» азæлыд Мариинаг театры филиалы. Концерты размæ ма фæстаг репетици. Солист Дулаты Дзамболат, йæ аккомпаниатор та Василий Попов. Цалдæр минуты ма, æмæ Дзæуджыхъæуы райдайдзæн Стыр театры артисты камерон концерт. Афтæмæй æххæстгонд цæуы цикл «Лариса Гергиева представляет».
Дулаты Дзамболат музыкæйы дунеимæ базонгæ йæ дада æмæ нанайы фæрцы. 9 азы йыл куы цыди, уæд æй æркæсынмæ æрбаластой Дзæуджыхъæуы аивæдты училищæмæ. Уæдæй фæстæмæ Дзамболат райдыдта зарын. Йæ баритон аивадуарзджытæн у зонгæ. Уымæн æмæ сси æцæг профессионал.
Залы къух бакæнæн нæ уыд, уæлдай бынæттæ та уæвгæ дæр. Ахæм зонгæ Сергей Рахманинов. Стæй ма фæстаг рæстæг арæх кæй нæ фехъусдзынæ, уыцы Николай Мясковский. Дулаты Дзамболат кæй азарыд, уыцы уырыссаг романстæ фæндаг ссардтой се ппæты зæрдæмæ дæр. Тыхджын къухæмдзæгъд , æмæ солисты миддуне сдзырдта поэт Дмитрий Мережковскийы ныхæстæй.
Дулаты Дзамболаты хи концерт Дзæуджыхъæуы арæзт æрцыд фыццаг хатт. Уыимæ йын йæ райгуырæн бæстæимæ фембæлд алы хатт дæр вæййы тынг ахсджиаг. Æгæрон уарзондзинад бæрæг дары суанг алы нотæйы дæр. Æмæ уымæй дæхи нæ бамбæхсдзынæ, – зæгъы оперон зарæггæнæг.
Дзамболат йæ аивадæй æмæ йæ курдиатæй музыкæ уарзджыты абалц кæнын кæны алы дунетæм. Уый та дзурæг у ууыл, æмæ æрыгон виртуоз ссардта йæ царды сæйрагдæр мидис æмæ нысан – аивадуарзджыты миддуне хъæздыгдæр кæнын.
