Ныр та историон бæтыхайы кусдзысты музей саразыныл
Дзæуджыхъæуы, зындгонд актер æмæ режиссер Евгений Вахтангов кæм райгуырдис, уыцы хæдзар скодтой реставраци. Ныр та историон бæтыхайы кусдзысты музей саразыныл. Афтæ дзы дыккæгæм уæладзыджы цæуы 19-æм æнусы хæдзары рацарæзт, фыццæгæм уæладзыджы та 80 бынатæн фæзындзæн камерон театралон зал, арæзт уыдзæни арт-кафейы хуызы. Ам цæудзысты моноспектакльтæ, сфæлдыстадон фембæлдтытæ æмæ концерттæ. Уæ зæрдыл уын æй æрлæууын кæндзыстæм, хъуыстгонд режиссеры райгуырæн хæдзарæн æмбæлгæ статус скæныныл бацархайдтой Мæскуыйы Вахтанговы номыл театры. Раздæры амалхъом адæймаджы хæдзар ис Дзæуджыхъæуы астæу, æмæ дзы куыстытæ цæуынц 2020-æм азæй нырмæ. Сæ куратор у театры директор Кирилл Крок. Ацы бонты дæр та бабæрæг кодта арæзтадон фæз.
