Архайдтой дзы нæ республикæйы районты æппæт минæвæрттæ
Дзæуджыхъæуы сывæллæтты сфæлдыстады райрæзты центр «Заря»-йы ацыд конкурс «Аивады уидæгты» финал. Архайдтой дзы нæ республикæйы районты æппæт минæвæрттæ. Республикон къæпхæнмæ рацыдысты, районты хуыздæры ном чи райста, уыдон. Конкурс баст у ирон æвзаг æмæ литературæйы бæрæгбонимæ. Уый фæдыл сывæллæттæ цы æрмæг бацæттæ кодтой, уый дæр æххæстæй уыд ирон æвзагыл. Куыд ацыд мадзал, уый тыххæй бæлвырддæр радзурдзæн нæ уацхæссæг Тъехты Элинæ.
Нæ республикæйы 7-æм хатт скъоладзауты æмæ рæвдауæндæтты хъомылгæнинæгты хсæн ацыд конкурс «Аивады уидæгтæ». Конкурсы фæлгæты архайджытæ бацæттæ кодтой цыбыр равдыстытæ. Плиты Алинæ ацы бонмæ йæхи тынг зæрдиагæй цæттæ кодта. Йæ аргъауы йæм æрхауд ахсджиаг хæс – авторы ныхæстæ дзурын. Æмæ уыцы хæс чызг сæххæст кодта иттæг хорз.
Конкурс арæзт у дыууæ къæпхæнæй. Фыццаджы, ома, районы чи рамбылдта, уыдон финалы – республикон къæпхæны ерыс кодтой хуыздæры номыл. Джызæлы 2-æм скъолайы 5-æм къласы ахуырдзаутæ районы фыццаг бынат куы бацахстой, уæд сæ ам дæр сæхи бафæндыд хорз равдисын.
Конкурс баст у мадæлон æвзаг æмæ литературæйы бæрæгбонимæ. Йæ саразыны хъæппæрис разынд РЦИ-А-йы сгуыхт ахуыргæнæг Хабæты Риммæмæ. Кæй зæгъын æй хъæуы, скъуыддзæгтæ дæр сывæллæттæ бацæттæ кодтой æрмæстдæр ирон æвзагыл.
Зæгъдзыстæм ма уый дæр, æмæ конкурс ерысы хуызы кæй цæуы, уымæ гæсгæ сывæллæттæ дæр сæхиуыл кусынмæ тынгдæр сразæнгард вæййынц.
Конкурсы уæлахиздзаутæ, архайджытæ æмæ сæ ахуыргæнджытæ хорзæхгонд æрцыдысты дипломтæй æмæ кады гæххæттытæй.
