Ахæм хъæппæрис хуымæтæджы нæ фæзынд, сбастой йæ Аланийы паддзахадыл дзуарæфтыды 1100 азы бонимæ
Æнахуыр, фæлæ уыимæ цымыдисаг хæслæвæрд. Дзæуджыхъæуы Дзанайты Азанбеджы номыл аивадон училищæйы «Дизайн»-ы хайады студенттæ аразынц Цæгат Ирыстоны дзуары бынæтты макеттæ. Ахæм хъæппæрис хуымæтæджы нæ фæзынд, сбастой йæ Аланийы паддзахадыл дзуарæфтыды 1100 азы бонимæ. Сæ куысты хатдзæгтæ курдиатджын лæппутæ æмæ чызджытæ раргом кæндзысты семестры кæрон. Фæлæ уал уый размæ семæ фембæлд нæ уацхæссæг Тъехты Элинæ, æмæ йын бакæсæм йæ сюжетмæ.
Нæ фыдæлты кувæндæттæ сног кæнын. Дзæуджыхъæуы аивæдты училищæйы студенттæ сæ разамонджытимæ кусынц уыцы хъæугæ хъуыддагыл. Барынц бæстыхæйттæ, цæмæй сын уый фæстæ скæной макеттæ. Ахæм хъуыддаджы хъæуы хынцын алы лыстæг куыст дæр. Бахъæуы йын бирæ рæстæг. Зæгъæн ис, æмæ студенттæ гыццылгай æмбырд кæнынц нæ республикæйы сæфт кувæндæттæ.
Хетæгкаты Аслан, Дзæуджыхъæуы аивадон училищæйы директор: «Фæндыд мæ, цæмæй нæ пырх кувæндæттыл бакусой нæ студенттæ. Аластон сæ Лисри æмæ Нармæ. Студентты иу хай райстой Нары дзуар, иннæтæ та Лисрийы аргъуан. Нæ проект рауад тынг хорз. Зæрдæ дарæм, гыцццыл фæстæдæр равдыст кæй сараздзыстæм, ууыл. Нæ кæстæртæ стыр куыст бакодтой æмæ сæ цæрæнбон бирæ уæд».
Ирон аргъуан, Нары дзуар æмæ бирæ æндæр кувæндæттæ. Студенттæ куыд зæгъынц, афтæмæй сæ куыстмæ уæлдай тынгдæр сразæнгард кæны кувæндæтты ахадындзинад ирон адæмы хсæн. Уæлдай зын сын у, хæлгæ цы кувæндæттæ фæкодтой, уыдоны макеттæ саразын. Уыдонæй иу у Нары дзуар дæр. Макет аразгæйæ студентты бахъуыд сæ фантазимæ гæсгæ кусын.
Габанты Агуындæ, Дзæуджыхъæуы аивадон училищæйы 3-æм курсы студенткæ: «Нæ директоримæ ацйыдыстæм Нармæ. Кувæндон куы сбарстам, уæд райдыдтам кусын. Йæ цыппар къулæй баззад æрмæстдæр дыууæ».
Рудзгуытæ цавæр уыдзысты, уый дæр чызджытæ æрхъуыды кодтой сæхæдæг. Куыд зæгъынц, афтæмæй æппæтæй зындæр сын уыд дуртæ æвæрын.
Макеттæ аразыны размæ студенттæ ацыдысты кувæндæттæм, æмæ сæ сбарстой. Уымæй уæлдай ма куыстой архивты дæр. Агуырдтой историон æрмæджытæ, кастысты кувæндæтты архитектурæмæ. Куысты рæстæг – иу кæм фæкъуылымпы сты, уым сын æххуыс кодтой сæ ахуыргæнджытæ.
Студенттæ макеттæ кæнын райдыдтой октябры. Куыстыты фылдæр хай конд æрцыд. Хатдзæгтæ сын скæндзысты семестры кæрон. Фæлæ уыцы куысты студенттæн сæйраг бæрæггæнæн райсын нæу, фæлæ истори ферох кæнын ма бауадзын .
Ирыстоны культурон бынтæ бахъахъхъæныны тыххæй студенттæ сæ разамонджытимæ кусынц, æрмæст сæфгæ цы кувæндæттæ фæкодтой, уыдоныл нæ, фæлæ ма æнæхъæн чи сты, ахæмтыл дæр. Уый та хорз у куыд рæзгæ фæлтæрæн сæхицæн, афтæ æнæхъæн республикæйæн дæр.
