Ацы хъæппæрисы фарс рахæцыди Сергей Меняйло дæр
Фыййаджыбылы арæзт æрцæудзæн ног арт-тыгъдад «Shkóla». Ацы хъæппæрисы фарс рахæцыди Сергей Меняйло дæр. Социалон проекты автор у амалхъом адæймаг Гаппуаты Маринæ. Сæргълæууæг йемæ æрныхас кодта аппæт лыстæг хъуыддæгтыл дæр. Кусæн фæзы хуызы Гаппуаты Маринæ бахаста фæндон, хъæуы зæронд скъола сцалцæг кæнын. Бындур æвæрд ын æрцыди 1929-æм азы, ныртæккæ эксплуатацийы нæй. Арт-тыгъдад «Shkóla» -йы территорийы арæзт цæудзысты, къухдæснытæ кæм архайдзысты, ахæм мадзæлттæ, стæй хæринаггæнджыты дæсныйадæвдисæг ахуыртæ. Фæнд ма дзы кæнынц хъæдæй конд хæдзар саразын. Ирдæй дзы равдисдзысты хъæуккаг цардыуаг. Сергей Меняйло бахæс кодта республикæйы промышленносты æмæ инвестициты министрадæн, стæй Æрыдоны районы разамындæн алывæрсыг æххуыс бакæнын, цæмæй социалон проект царды рауадзынæн æмбæлгæ документтæ тагъддæр бацæттæ кæной, уый тыххæй.
