Ацы хъуыддаг ын цымыдисаг уыд йæ сабибонтæй фæстæмæ
Наталья Юркова у хъуымацыл нывгæнæг. Ацы хъуыддаг ын цымыдисаг уыд йæ сабибонтæй фæстæмæ. Йæ куысты пайда кæны алыхуызон техникæтæй. Бантыст ын академион ахуырад æмæ национ стиль баиу кæнын. Æрмдæсныйы тыххæй бæлвырддæр радзурдзæн Хъайтмазты Дзерассæ.
Наталья Юркова йæ цард аивадæн снывонд кодта. Сæйрагдæр ын у – хъуымацыл графикæ. Йæ куыстыты коллекци дисы æфтауы. Уый у академион ахуырады æмæ национ стилы симбиоз. Наталья кусы ирон орнаментимæ, æвдисы йæ эскизы. Йæ къухты хъуымацы хуымæтæг гæппазæй рауайы аивады цымыдисаг предмет.
Наталья у зæрдæмæдзæугæ хъуыддагыл чи фæхæст, ахæм адæймаг. Ацы къабазмæ йе ргом йæ сабибонтæй здæхта. Кæддæр нывгæнджыты нымадта уæларвон цæрджытыл, уымæ гæсгæ йæ бæллиц уыд аивады архайын. Алы дзаумайы дæр Наталья бавæры йæ уды хъарм. Йæ ныхæстæм гæсгæ, уый йын хуымæтæджы кусæг процесс нæу. Афтæмæй йæ фæллад уадзы.
Наталья æрмæст æрфыстытæ нæ кæны. Сахуыр кодта хъуымацимæ куысты алы хуызтæ. Се *хсæн – нывхуыд, хызгондбыд, макраме, аивадон нывæфтыд. Наталья Юрковайæн бантыст йæхи аивады дунейы ссарын. Уымæн æмæ кæны, йæ зæрдæ йын цы амоны, стæй иннæ адæмы зæрдæтæн хæстæг цы у, уый.
