Сюжет арæзт у нымæты куыст кæныны рагон традицитыл, стæй ма уыцы рæстæг æрмдæсныйады куыст кæнгæйæ, сылгоймæгтæ цы зарæг кодтой, ууыл дæр
«Нымæт». Кæронмæ æрхæццæ, ирон адæмы рагон цардыуаг æмæ культурæ æвдисæг цыбырметражон киноныв исыны процесс. Сюжет арæзт у нымæты куыст кæныны рагон традицитыл, стæй ма уыцы рæстæг æрмдæсныйады куыст кæнгæйæ, сылгоймæгтæ цы зарæг кодтой, ууыл дæр. Съемкæтæ цыдысты Дæллаг Уыналы. Сæйраг фæз та сси – этнокультурон музей – Цæллагты мыггаджы мæсыг. Цæмæй 19-æм æнусы тæваг æмæ æууæлтæ æххæстæй æвдыст æрцæуой, уый тыххæй кино исыны рæстæг пайда кодтой ирон адæмы рагон царды предметтæй. Ист æрцыдысты Цæгат Ирыстоны Национ музейы æвæрæнтæй. Сценикон уæлæдарæс та сын рахай кодта Тæбæхсæуты Балойы номыл Ирон академион театр. Кинонывмæ ма бахастой уæды дуджы хохаг адæмы цардæй ист нывтæ. Бæлвырддæр та – донмæ куыд цыдысты, æртыгай кæрдзынтæ куыд куывтой, быдырты куыд куыстой, уазджытыл куыд æмбæлыдысты, рагон ирон хъæзтытæй куыд хъазыдысты, æмæ ма бирæ æндæр цымыдисаг хъуыддæгтæ. Съемкæты зæрдиагæй архайдтой Ирон академион театры артисттæ, стæй Дзанайты Ольгæйы разамындæй Национ зарæджы нæлгоймæгты хор. Киноныв «Нымæт» у – ирон адæмы æгъдæутты, традициты æмæ æрмдæсныйады тыххæй видеоцикл «Къона»-йы фыццаг проект. Æххæст æй кæнынц «Культурон хъæппæристы Президентон фонды» æххуысæй. Проекты автор æмæ продюсер у Бзарты Аланæ. Режиссер-æвæрæг Пагæты Фатимæ, монтажы режиссер Æлборты Нинæ. Премьерæ уыди 31-æм июлы, Паддзахадон телерадиокомпани «Алани»-йы эфиры. Киноныв фенæн уыдзæн интернеты æмæ социалон хызты дæр.
