Ныр та уал æй премьерæйы агъоммæ равдыстой аивадиртасджытæн, æмæ актерты хæстæджытæн
Киноныв «7 сау гæххæтты» прокаты рацæудзæн 9-æм майы. Ныр та уал æй премьерæйы агъоммæ равдыстой аивадиртасджытæн, æмæ актерты хæстæджытæн. Киноныв ист у ирон фыссæг Булкъаты Михалы уацмысмæ гæсгæ. Ирдæй дзы æвдыст цæуынц хæсты уæззау рæстæджытæ. Цæгат Ирыстоны йæ фендзысты ирон æвзагыл, фæлæ уырыссаг титртимæ, Уæрæсейы иннæ регионты та тæлмацгондæй. Бæлвырддæр радзурдзæн Касаты Наирæ.
Дзæуджыхъæуы ацыд киноныв «7 сау гæххæтты» премьерæйы агъоммæйы равдыст. Федтой уал æй аивадиртасджытæ, культурæйы къабазы кусджытæ æмæ актерты хæстæджытæ. Кинолентæйы ирдæй æвдыст цæуы рыст æмæ цавæрдæр ныфс. Режиссер Колыты Анатолийы æххæстметражон дебют, Булкъаты Михаилы радзырд. Йæ аивадон разамонæг Клим Шипенко, генералон продюсер Сохъуырты Аслан. Кинонывыл куыд куыстой æмæ сæ размæ цавæр хæстæ æвæрд уыди, уый тыххæй актертæ радзырдтой пресс-конфернецийы рæстæг. Колыты Анатолийæн та ма ацы истори йæхимæ дары комкоммæ бар.
Кадры – хæхбæстæ, 1942-æм аз. Бечыр æмæ Дзамбол сæ фыдмæ æнхъæлмæ кæсынц фронтæй. Бонæй-бонмæ лæппутæ кæсынц, æвзонг постхæссæг хæдзæрттæм сау гæххæттытæ куыд хæссы, уымæ. Хъæу бахауд фыдохы уацары. Афтæмæй лæппуты зæрдæтæ уынгæг кæнынц. Æфсымæртæ постхæссæгæн лæгъстæ кæнынц, цæмæй уал уый сау хабар хъусынгæнæг гæххæттытæ бамбæхса, цалынмæ хæст фæуа, уæдмæ. Цæмæй æрыгон актертæ сæ сурæттæ зæрдæйæ банкъарой, уый тыххæй съемкæты размæ ацыдысты архивтæм, кастысты фронтæй æрвыст æртæкъуымон фыстæджытæ.
Æвдыст цæуы Цæгат Ирыстоны 8 хъæуы, фæлæ съемкæты сæйраг фæз сси Къæмунтæ. Актертæ ардæм æрбацыдысты дзæвгар раздæр, цæмæй хæхбæсты æууæлтæ æххæстæй банкъарой. Æвзонг Абойты Зауырбег сахуыр хъуыг дуцыныл, стæй суанг кæлмытимæ архайыныл, Хъараты Максим та фæндырæй цæгъдыныл. Йæ фыццаг къухайст фæндырыл хаст æрцыди кинойы райдиан кадртæм. Кинолентæйы хицæндзинæй ма иу у уый, æмæ йын цы музыкæ ныффыстой, уый иууылдæр у фæндыры зæлтæй. Æртæ æрыгон актерæн кинойы съемкæтæ сты ног фæлæ ныридæгæн æнтыстджын фæлтæрддзинад.
Колыты Анатолийы дебютон куыст прокаты райстой 220 кинотеатры æппæт бæстæйæ. Кино фæзындзæн 3 сæдæ экранæй фылдæрыл. Аивадиртасджыты хъуыдымæ гæсгæ, хорз режиссер бæрæг вæййы, фынтæ куыд исы, уымæй. Ныр аивадуарзджытæн фадат ис, æрыгон режиссер йæ размæ вæрд хæстæ куыд сæххæст кодта, уымæн аргъ скæнынæн. «7 сау гæххæтты» кинотеатрты фенæн уыдзæни 9-æм майæ фæстæмæ. Цæгат Ирыстоны йæ равдисдзысты Дзæуджыхъæуы, Алагиры æмæ Æрыдоны.
