Программæ «Хъæуты территориты райрæзт» хъуамæ фæбæрæг уа æрыгон специалистты архайдыл дæр.
Колходзы 30 азæй фылдæр чи бафыдæбон кодта æмæ абон дæр хъæуы чи цæры, уыцы адæм сæ пенситæм райстой уæлæмхасæн 25%. Программæ «Хъæуты территориты райрæзт» хъуамæ фæбæрæг уа æрыгон специалистты архайдыл дæр. Фæсивæдæн дзы саразын хъæуы царды уавæртæ, цæмæй хъæутæй хуыздæр цард агуыр ма цæуой, уый тыххæй.
Хъæцмæзты Гавриил у Архонкæйы дзырддзæугæдæр хистæртæй иу. Зæххы куыст кæны 1944 азæй фæстæмæ.
Ацы документы æвдыст цæуы Гаврилы фæллойы цардвæндаг. Фæндзай азы бакуыста йæ райгуырæн колхозы. Куыддæр æфсадæй сыздæхт, афтæ райдыдта кусын шофырæй. Кæд æмæ пенсийы рацыдис, уæддæр уæдæй нырмæ йæ ахуыр нæ халы.
Хъæцмæзты Гавриил ныр дæр ма хорз хъуыды кæны, хæсты фæстæ колхозы райрæзтыл куыд куыстой, уый. Цалдæр азмæ иу сæххæст кодтой фондз азы нысантæ, æркарстой иу хорз тыллæг, уæдæ Намысы сырх тырысса дæр сæ къухæй не суæгъд кодтой. Фæсте баззадысты лæгæвзарæн замантæ. Уæд кусæг лæджы кадæн аргъгæнæг нал уыдис.
Йæ пенсийыл кæй бафтдзæн, уый тыххæй Гавриил газеттæй базыдта. Ацы аз январæй фæстæмæ, колхозы æртын азы чи бакуыста æмæ ма ныр дæр хъæуты чи цæры, уыцы адæмы фиддонтыл бафтыдис дыууын фондз проценты.
Нæ республикæйы пенсиисджытæй иу мин æмæ авдсæдæйæн бафтыд сæ пенситæм дыууын фондз проценты.
Тракторист Демыраты Хъазыбегы бинонтыл сæмбæлд цины хабар. Хæдзары хицауæн радтой йæ цæрæнуат фæхуыздæр кæнынæн сертификат. Æрыгон бинонтæ цæрынц Ног Бæтæхъойыхъæуы сæ ныййарджытимæ. Хи хæдзарæн æхца æрæмбырд кæнын сæ къухы дæс азæй раздæр нæ бафтыдаид.
Цæрæнуæттæ фæхуыздæр кæнын сæ къухы бафтыдис паддзахадон программæйы фæрцы. Афæдзы райдианæй сертификаттæ райстой хъæуы фынддæс цæрæджы. Афæдзы райдианмæ та ма паддзахад баххуыс кæндзæн нæуæдз æхсæз специалистæн. Уыдон сты дохтыртæ, ахуыргæнджытæ, культурæйы кусджытæ.
