Хаст æм æрцæудзæн нывкæнынады æмæ декоративон æрмдæсныйады 50 куыстæй фылдæр
Хæдбындур нывгæнæг Къорнаты Владимиры сæрмагонд равдыст абон байгом уыдзæн национ наукон библиотекæйы. Хаст æм æрцæудзæн нывкæнынады æмæ декоративон æрмдæсныйады 50 куыстæй фылдæр. Автор сæ скодта алы азты. Владимир нывкæнынадмæ йе ргорм аздæхта, пенсийы куы рацыд, уæд. Ныртæккæ мастеры хæдзарон галерйы ис 100 куыстæй фылдæр. Йæ равдыстытæ фенæн уыд республикæйы наукон æмæ нотæты библиотекæты. Уымæй дарддæр Цæгат Ирыстоны нывгæнджыты Цæдисы залты. Владимиры куыстытæ хицæн кæнынц се рмдзæфæй. Кæд нывгæнæгыл 84 азы цæуы, уæддæр у уæнгрог, æмæ аивадмæ тырнæг адæймаг. Æнцад бадын нæ уарзы. Къорнаты Владимир æнтыстджынæй кусы алы жанрты: пейзаж, портрет, натюрморт, сюжетон композицитæ. Нывгæнæг цæры Дигорайы. У регионалон, республикон æмæ районы равдыстыты активон архайæг æмæ лауреат. Йæ куыстытæ сты Уæрæсейы æмæ фæсарæнты музейты аивадон æмбырдты æмæ сæрмагонд коллекциты.
