Амæй фæстæмæ дзы адæмæн лæггад кæндзысты дохтыр-терапевт, фелсыр, медицинон хо æмæ санитарон кусæг
Дыгургомы хъæутæй иу Мацутæйы кадджын уавæры байгом кодтой ног фельдшерон-акушерон пункт. Амæй фæстæмæ дзы адæмæн лæггад кæндзысты дохтыр-терапевт, фелсыр, медицинон хо æмæ санитарон кусæг. Уымæй дарддæр ма дзы медикаменттæ уæй кæнынæн байгом уыдзæн афтечы пункт. Уæдæ сæм ис тагъд æххуысы машинæ дæр. Бæстыхай дзупп дæтты нырыккон домæнтæн, æмæ йæ сифтонг кæндзысты æмбæлгæ кусæнгæрзтæй. Проект царды рауагътой, Уæрæсейы паддзахадон программæ «Æнæниздзинадхъахъхъæнынады райрæзт» æххæст кæнгæйæ. Куыстыты аргъ слæууыд 16 милуан сомæй фылдæр. Бæлвырддæр хабæрттæ радзурдзæн Тъехты Элинæ.
Традицимæ гæсгæ, æрты чъирийымæ байгом, Мæцутæйы бирæ кæмæ æнхъæлмæ кастысты, уыцы фельдшерон-акушерон пункт Дыгургомы уазджытæн.
Педиатры уат æмæ терапевтон кабинет. Бæстыхайы ис æппæт хъæугæ техникæ. Дефибрилятор, ЭКГ-йы аппарат æмæ компьютертæ. Æппæт техникæ у ног æмæ нырыккон. Хъæуы дзы æрмæстдæр хъæддзаума сæвæрын. Хъæуы цæрджытæ ахæм лæварыл цин кæнынц. Раздæр ацы бынаты уыд тагъд æххуысы пункт, фæлæ рынчынты домæнтæ хорз не ххæст кодта.
Лагкуыты Омар, Æрæфы районы бынæттон администрацийы сæргълæууæг: «Абон дыгургомы æрцыд хорз хъуыддаг. Мæцутæйы байгом кодтам фельдшерон-акушерон пункт. Ныр адæмæн уыдзæн сæ æнæниздзинад фæхуыздæр кæнынæн фадат. Ис дзы хорз медицинон техникæ. Махæн ацы хъуыддаг тынг æхсызгон у, уымæн æмæ ахады дыууæ комыл.
Акушерон пункты кусынц дохтыр, фельдшер æмæ дыууæ медицинон хойы. Ис дзы тагъдæххуысы машинæ дæр. Кусы программæ «Земский доктор»-мæ гæсгæ Æрæфы районы. Цæргæ дæр кæны ам. Базонгæ медицинон кусджытимæ æмæ хъæуы цæрджытимæ.
Тедеты Мæирбег, бынæттон терапевт: «Фельдшерон-акушероон пункт куы фæзынд, уæдæй нырмæ адæмы уавæртæ бирæ фæхуыздæр сты. Иннæ хъæуты дæр сты æмæ уым дæр æнцондæр цæрæн у. Алкæй бон нæу дард ранмæ цæуын, ныр та хæстæг ран райсæн ис медицинон æххуыс. Цæмæй кусæм æмæ цæмæй архайæм, уый нæм ис.
Ахсджиаг ма у уый дæр, æмæ туристтæ хæхты баулæфынмæ куы хъавой, уæд сæ ницæуыл тыхсын хъæудзæн. Хæстæг у национ парк «Алани» æмæ хæххон-къахдзоныгътыл бырæн трассæ. Æнæнхъæлæджы уавæры дæр æххуыс райсæн ис 20-30 минутмæ.
Акушерон пункт арæзт æрцыд Уæрæсейы æнæниздзинадхъахъхъæнынады рацарæзты паддзахадон программæмæ гæсгæ. Министр Тебиаты Сосланы ныхæстæм гæсгæ ацы фельдшерон-акушерон пункт тынг ахсджиаг у, уымæн æмæ лæггад кæны дыууæ комæн. Тагъд рæстæджы дзы банывыл уыдзæн афтекты пунктты куыст дæр.
Æрæфы районы саразынмæ кæй хъавыдысты, уыдонæй ацы объект у æвдæм æмæ фæстаг фельдшерон-акушерон пункт. Дарддæр æнæниздзинадхъахъхъæнынады хайады æнхъæлмæ кæсынц, цæмæй Æрæфы поликлиникæ байгом уа. Ныр æй цалцæг кæнынц. Фæлæ æнæниздзинадхъахъхъæнынады рацарæзты фарста районы хæххон хайы æххæстæй лыггонд æрцыд.
