Нырма уал сæ продукцийы бæрц афтæ бирæ нæу – суткæмæ 400 литры
Æхсыр æмхуызон кæй нæ вæййы, уый фæлхасгæнджытæ рагæй бамбæрстой. Уымæ гæсгæ фылдæр æвзарынц хæрзхъæд продукци, æнæ хъацæнтæй. Ацы бонты нæ регионы æхсыры куыстгæнджыты рæнхъытæ баххæст кодта ног куыстуат Заманхъулы. Нырма уал сæ продукцийы бæрц афтæ бирæ нæу – суткæмæ 400 литры. Куыстуаты фæллой кæны 3 фæлтæрдджын специалисты. Фæлæ уал уый фаг у. Фидæны фæнд кæнынц сæ архайд фæпарахатдæр кæнын. Ныртæккæ уал республикæйы дуканиты тæрхæджыты фенæн ис æхсыр æмæ мисын. Æхсыры цъæрттæ, къæдор æмæ цыхт балхæнын дæ куы фæнда, уæд уыцы продукци та хъæудзæн комкоммæ куыстуатмæ бацæугæйæ самал кæнын. Дуканиты тæрхæджытæм хæццæ кæндзысты, куыстуат йæхицæн бренд æмæ сæ номимæ къоппытæ куы сбæлвырд кæной, уæд. Уымæй дарддæр заманхъуйлаг продукци ныртæккæ дæр агурынц фæлхасгæнджытæ, зæгъынц специалисттæ. Куыстуаты разамонæг Карсанаты Мурат куыд радзырдта, афтæмæй сæ сæйрагдæр раппæлинаг хъуыддаг у уый, æмæ продукци у æрдзон æмæ хæрзхъæд.
