Уыдон бахъахъхъæныныл архайынц бирæ специалисттæ
Нæ республикæйы ис, чи рабæрæг, культурон намысы ахæм 1300 объектæй фылдæр. 670 цыртдзæвæны та ма сты иумæйаг паддзахадон реестры. Цæгат Ирыстоны ис историйы бирæ æвдисæнтæ – мæсгуыты комплекстæ, историон бæстыхæйттæ. Бирæтæ дзы систы музейтæ. Уыдон бахъахъхъæныныл архайынц бирæ специалисттæ. Сæ куысты тыххæй бæлвырддæр радзурдзæн Хъайтмазты Дзерассæ.
Лисрийы мæсгуыты комплексы сæфт фрагменттæ сног кæнын, æмæ уыимæ, æнæмæнг, объекты æппæт хицæндзинæдтæ бахынцын. Уый æнцон хæс нæу. Фæлæ, специалистты ныхæстæм гæсгæ, афтæмæй цымыдисагдæр у. Фидæны куысты схемæ саразыныл компанийы архайдтой 6 мæйы. Уыцы рæстæгмæ чысыл зындзинæдтæ нæ сæвзæрд.
Проектмæ бавналыны размæ, специалисттæ сарæзтой мæсгуыты комплексы 3д модель. Уый фæрцы дарддæр æххæст кодтой сæ куыст. Уыимæ æдзух хъуыдис Лисримæ цæуын – бынаты кæсын.
Æмæ кæд мæсгуыты комплексы реставраци нырма фæндты ис, уæд Евгений Вахтанговы хæдзар-музейы та куыстытæ кæронмæ фæхæццæ кæнынц. Объекты сæйраг хæзна сты – дуæрттæ æмæ рудзгуытæ. Иуæй-иутæ дзы сты историйы æвдисæнтæ. Уыдонмæ гæсгæ сног кодтой иннæтæ дæр. Реставраторты хæс уыд, бацархайын, цæмæй ногтæ зæрондтæй ма хицæн кæной, ууыл. Æмæ уый къухы бафтыд, уымæн æмæ алы хъуыддагмæ дæр лæмбынæг æвнæлдтой. Иртæстой æмæ ног кодтой алы къуым дæр. Реставраци ахаста 2 азы бæрц. Ацы хъуыддаджы стыр нысан ис заказгæнæгæн дæр. Евгений Вахтанговы номыл паддзахадон академион театры директор Кирилл Крок йæхæдæг дардта цæст, куыстытæ куыд æххæстгонд цæуынц, уымæ.
Культурон намысы алы объект дæр у сæрмагонд. Уымæ гæсгæ, семæ кусын кæддæриддæр вæййы стыр бæрнондзинад. Реставраци скæнын – хуымæтæджы саив кæнын нæ нысан кæны, фæлæ бахъахъхъæнын истори цы балæвар кодта, уый.
Культурон намысы цыртдзæвæнты æмæ историон бынæтты реставраци стыр фæллой у. Бирæ зындзинæдтæ сæвзæры. Боны ахастæй райдай æмæ æнæзынгæ хæлдтытæй фæуы. Фæлæ уый, ацы хъуыддагыл лæуд чи у, уыдоны нæ уромы. Специалисттæ куыд зæгъынц, афтæмæй сæйрагдæр у, ацы куыстæн цы ахсджиаг нысаниуæг ис, уый.
