Ног фæз, егъау рацарæзты фæстæ байгом Евгений Вахтанговы номыл хæдзар-музейы
Нæ республикæйы цæрджытæн æмæ уазджытæн амæй фæстæмæ фадат ис культурон изæртæ рвитынæн арт-кафейы. Ног фæз, егъау рацарæзты фæстæ байгом Евгений Вахтанговы номыл хæдзар-музейы. Бынаты фенæн ис цалдæр стъолы, къултыл та рагон театралон афишæтæ. Чысыл бæстыхай, фæлæ йæхи æнæбафæзмгæ тæвагимæ. Уæлдай зæрдæмæдзæугæ та – сценæ. Интерьерыл бакуыста Мæскуыйы Вахтанговы номыл театры сæйраг нывгæнæг Максим Обрезков. Зæгъдзыстæм ма уый дæр, æмæ сценæмæ кæй рацæудзысты артисттæ-вахтанговецтæ, хъуыстгонд мастертæ Мæскуыйæ æмæ Дзæуджыхъæуæй. Уыдон араздзысты сфæлдыстадон изæртæ. Арт-кафе байгом кодта Евгений Князевы моноспектакль «Пиковая Дама». Цымыдисаг истори, уыимæ хъæздыг алыхуызон сусæгдзинæдтæй æмæ æнахуыр хъуыддæгтæй. Спектаклы алцыдæр у ахсджиаг. Музыкæ дæр раст цыма радзырды архайæг у, афтæ. Ног культурон фæзимæ уал базонгæ сты фыццаг уазджытæ.
