Фадат сын ис æрдзон рæсугъддзинад фенынæн, стæй национ хæринæгтæ сахуыр кæнынæн дæр
Нæ республикæйы уазджытæн Ирыстон балæвар кæны бирæ æнкъарæнтæ. Фадат сын ис æрдзон рæсугъддзинад фенынæн, стæй национ хæринæгтæ сахуыр кæнынæн дæр. Ахæм ахуыртæ ацæуынц Дзæуджыхъæуы этноцентры. Кусы мæйы бæрц, фæлæ уыцы рæстæгмæ сси туристты æмæ нæ республикæйы цæрджыты уарзондæр бынæттæй иу. Фæлæ хъæппæрисджын адæм ууыл æрлæууынмæ нæ хъавынц. Ныридæгæн хъуыды кæнынц, сæ уазджытæн ма цымыдисаг чи уыдзæн, ахæм мадзæлттæ саразыныл. Цавæр лæггæдтæ кæны центр адæмæн, уый тыххæй радзурдзæн Тъехты Элинæ.
Куыд кæнын хъæуы национ чъириты хыссæ æмæ йын цавæр сусæгдзинад ис? Уыцы лыстæг хъуыддæгтæ ргом кæнынц, Дзæуджыхъæуы этноцентры цы дæсныйадæвдисæг ахуыртæ саразынц, уый фæлгæты. Ам сахуыр кæныны фадат ис куыд дæсны фсинтæн, афтæ сывæллæттæн дæр.
Национ хæринæгтæ уæлдай цымыдисаг сты туристтæн. Республикæйы уазджыты ирон чъиритæ канд ацаходын нæ фæфæнды, фæлæ ма куыд кæнгæ сты, уый базонын дæр. Стъолы уæлхъус ссад æмæ хыссæимæ архайы Гульнара Румянцева. Цæгат Ирыстоны ис 2-аг хатт. Йæ Ног азы фæлладуадзæн бонтæ йæ арвитын бафæндыд ам, нæ республикæйы. Архайы дæсныйадæвдисæг ахуырты.
Хæринаггæнæджы бирæазон арæхстдзинад нæ хынцгæйæ, ирон чъиритæ йын иттæг хорз нæ рауайынц. Фæлæ Гульнарæйæн ис йæхи зондахаст хойраджы сусæгдзинады тæххæй.
Этноцентры дæсныйадæвдисæг ахуыртæй уæлдай ма саразынц бирæ æндæр мадзæлттæ. Ирон адæмы культурæ банкъарæн ис галерейы æмæ музейон комплексы руаджы дæр. Ам адæмы зонгæ кæнынц, æнусты размæ ирон адæм цы фæрæзтæй пайда кодтой, уыдонимæ, стæй сæ традицитимæ. Центр йæ куыст кæнын æрæджы райдыдта, фæлæ уыцы рæстæгмæ сси туристты уарзондæр бинæттæй иу. Мæймæ ардæм æрбацæуынц 500 адæймагæй фылдæр. Хъæппæрисджын адæм саразынц дæсныйадæвдисæг ахуыртæ æмæ тематикон мадзæлттæ.
Ирыстоны хæхты баулæфын хорз у, фæлæ республикæйы уазджытæн цымыдисаг æрмæст рæсугъд æрдз нæу. Фæнды сæ ирон адæмы, сæ культурæ æмæ сын сæ истори хуыздæр базонын. Ууыл та кусынц этноцентры.
