Экспозицимæ хаст æрцыдысты æрыгон авторты уацмыстæ
Нывгæнджыты Цæдисы байгом æрвылазон равдыст «Ирыстоны æвзонгдзинад». Экспозицимæ хаст æрцыдысты æрыгон авторты уацмыстæ. Се хсæн нывгæнджыты Цæдисы уæнгты, ЦИПУ-ы аивæдты факультеты студентты, архитекторты æмæ дизайнерты куыстытæ. Равдыстмæ се вæрæн бахастой Дзанайты Азанбеджы аивæдты училищæйы ахуырдзаутæ дæр. Портреттæ, натюрморттæ, пейзажтæ, гобелентæ æмæ суанг куклатæ – æдæппæтæй равдысты равæрдтой 150 куыстæй фылдæр. Куыстытæ конд сты академион нывкæнынады, абстрактон аивады æмæ æмхæццæ техникæйы жанрты. Се ппæты дæр равзæрстой карз домæнтæм гæсгæ. «Ирыстоны æвзонгдзинад» у экспериментты равдыст, авторæн йæхи æнæбафæзмгæ стиль равзарынæн. Йæ архайджытæ традицимæ гæсгæ æвдисынц алыхуызон жанртæ, æмæ сфæлдыстадмæ хицæн цæстæнгас. Равдыст ахæсдзæн апрелы кæронмæ.