Сфæлдыстадон балц акæндзæн Уæрæсейы 10 горæтмæ
Паддзахадон академион ансамбль «Алан» цæттæ кæны стыр гастрольтæм. Сфæлдыстадон балц акæндзæн Уæрæсейы 10 горæтмæ. Архайдзæн ма федералон каналтæй иуы эфиры. «Алан»-ы залы ныртæккæ цæуынц бындурон цалцæгггæнæн куыстытæ, уымæ гæсгæ артистты рæстæгмæ суазæг кодта ансамбль «Хæхты сывæллæттæ». Уый сфæлдыстадон къорды архайдыл нæ фæзынд. Куыст цæуы бæлвырд фæткмæ гæсгæ. Бæстондæр хабæрттæ радзурдзæн Хъайтмазты Дзерассæ.
Балетон классикæ репитицитæгæнæн залы. Афтæ райдайы ансамбль «Алан»-ы бон. Чызджыты къухты фæлмæн айст, лæппуты цæрдæг фæлтæрæнтæ. Артистты алы змæлд дæр æвдисы кавказаг темперамент. Аивадон разамонæг лæмбынæг цæст дары эмоцитæм, сценæйы алы чысыл хъуыддаг дæр ахсджиаг у.
«Алан» цæттæ кæны стыр гастрольтæм. Паддзахадон ансамбль æрбахуыдтой Уæрæсейы горæттæм турмæ. Уый фæстæ та архайдзæн федералон каналтæй иуы эфиры. Ирон артисттæм æнхъæлмæ кæсынц Калининграды облæсты, Псковы, Тверы, Тулæйы, горæт Великие Лукийы.
Уæрæсейаг аивадуарзджыты дисы æфтаудзысты классикон программæйæ. Уырдæм хауынц, ансамбль иннæтæй бæрæг кæмæй дары, уыцы кæфтытæ: «Симд», «Хонгæ», «Фыййæуты хъæзтытæ», «Хæхты цæргæстæ», чызджыты кафт, «Мах алантæ», Кавказы адæмты кæфтытæ.
Ахæм гастрольтæ алантæн рагæй нæ уыд. Артисттæ куыд зæгъынц, афтæмæй мысынц уæрæсейаг горæтты сценæтæ, уæлдайдæр та – сæ алы змæлдмæ дæр сын цымыдисагæй чи кæсы, уыцы аивадуазджыты.
Стыр гастрольтæм «Алан» йæхи уарзон залы нæ цæттæ кæны. Цæуынц дзы цалцæггæнæн куыстытæ. Коллектив репицитæ кæны ансамбль «Хæхты сывæллæтты» залы. Ам дæр хорз уавæртæ ис, зæгъы Козаты Зелимхан. Куыст иу бон дæр не рлæууыд.
10-æм июны ансамблы сæйраг сконд йæ курдиат равдисдзæн Калиниграды – Уæрæсейы Бонмæ арæзт æппæтадæмон фестиваль æххæстгæнгæйæ. Уый фæстæ та йын уыдзæн гастролон къуыри. Уыимæ ма «алантæ» кусынц ног кафæн композицитыл дæр. Гæнæн ис, æмæ иннæ турмæ, легендарон ансамбль бацæттæ кæндзæн ног программæ, фæлæ æнæивгæ баззайдзæн аивадуарзджыты æгæрон уарзт.
