Экспозици цæттæ кæнын райдыдтой, нырма мастер æгас куы уыд, уæд
«Кинойы костюм». Республикæйы театралон аивады музейы байгом, Сабанты Снежкина Инессайы номыл равдыст. Экспозици цæттæ кæнын райдыдтой, нырма мастер æгас куы уыд, уæд. Дзæуджыхъæумæ сластой, цы костюмтæ скодта, уыдон. Киностуди «Ленфильм»-ы костюмты раззагдæр нывгæнæг йæ цардæй ахицæн фарон ноябры. Йе сфæлдыстады – 20 кинонывæй фылдæр, хуыздæр кинематографисттимæ куыст æмæ студентты ахуырад. Йæ курдиат раргом историон æмæ фантастикон костюмты. Инессæ уарзта паддзахты æмæ Хурыскæсæн бæстæты сылгоймæгты рæсугъд къабатæ аразын. Кинематографийы æппæтуæрæсеон паддзахадон университет каст куы фæцис, уæд бацыд «Ленфильм»-мæ æмæ уым райдыдта йæ профессионалон сфæлдыстадон фæндаг. Куыста зындгонд режиссертимæ, оператортимæ æмæ актертимæ. Се *хсæн – Людмила Гурченко, Иннокентий Смоктуновский, Александр Калягин, Ирина Купченко. Равдыстмæ Дзæуджыхъæумæ ссыдысты Инессæйы фырт Иван Снежкин æмæ мастеры цардæмбал, режиссер Сергей Снежкин. Инессæ цы проектты куыста, уыдонæй зындгонддæр сты Сергей Бондарчукы киноныв «Красные колокола», Сергей Снежкины «Контрибуция» æмæ Виктор Мережкойы «Сонька Золотая ручка». Равдыст ахæсдзæн сæрды кæронмæ.
