Трагеди раргом кодтой Адыгейы Республикæйы театралон иугонды актертæ
Тæбæхсæуты Балойы номыл Ирон академион театры арæзт æрцыд спектакль «Паддзах Эдип»-ы равдыст. Трагеди раргом кодтой Адыгейы Республикæйы театралон иугонды актертæ. Уæлдай цымыдисаг у, адыгейаг æвзагыл кæй уыд, уый. «Паддзах Эдип»-ы истори нымад у трагикон уацмысы идеалыл. Театралон иугонды аивадон разамонæг куыд зæгъы, афтæмæй спектакль ног хуызы раргом уыдзæн, зонгæ кæмæн у, уыцы адæмæн дæр. Куыд ацыд премьерæ, уый тыххæй бæстондæр радзурдзæн Тъехты Элинæ.
Зындгонд сюжет аивадуарзджытæн раргом кодтой ног хуызы. Спектакль «Паддзах Эдип»-ы хъайтартæ дзырдтой адыгейаг æвзагыл. Адæмæн фадат уыд тæлмацæй спайда кæнынæн. Актертæ трагедийы æнкъарæнтæ афтæ хорз раргом кодтой, æмæ йын йæ сюжет бамбарæн уыд æнæдзургæйæ дæр.
Спектаклы режиссер – Константин Мишин. Йæ разамындæй Адыгейы Национ театры актертæ премьерæмæ сæхи цæттæ кодтой 2 мæйæ фылдæр. Сфæлдыстадон къорд сæхи республикæйы пьесæ равдыстой октябры райдиан. Дзæуджыхъæуы та сын премьерон равдыст уыд 3-аг хатт.
Адыгейы Национ театры репертуаримæ цæгатирыстойнаг аивадуарзджытæ рагæй зонгæ сты. Тæбæхсæуты Балойы номыл ирон академион театры аивадон разамонæг Уалыты Гиви куыд зæгъы, афтæмæй хорз у, театрты хсæн хæлардзинады ахастдзинæдтæ куы уа, уæд.
Дарддæр спектакль равдисдзысты Мæскуыйы, уый фæстæ та бæстæйы иннæ горæтты дæр.
