Сæхи дзы фæлварынц 7 -æй 17 азы онг кæуыл цæуы, рæзгæ фæлтæры уыцы минæвæрттæ
Цардæй ист ирд цаутæ. Актеры дæсныйад, хореографи, вокал, аив дзырды сусæгдзинæдтæ. Ахæм ахадгæ программæ ис, Цæгат Ирыстоны академион театры цур æвзонг актерты студийы. Сæхи дзы фæлварынц 7 -æй 17 азы онг кæуыл цæуы, рæзгæ фæлтæры уыцы минæвæрттæ. Студийы сын бацæттæ кодтой æппæт уавæртæ, уыимæ ахуыртæ сты лæвар. Фæсивæд сæхи куыд æвдисой, уымæ гæсгæ сæ æрбахондзысты Ирон театры спектакльты архайынмæ дæр. Сфæлдыстадон процесс йæхи цæстæй федта не сфæлдыстадон къорд дæр. Бæлвырддæр – Касаты Наирæ.
Æвзонг актрисæ Мырзахъулты Алинæ Ирон театры цур актерты студийы архайы ивгъуыд азы октябрæй нырмæ. Чызг рæвдауæндонмæ куы цыди, уæдæй нырмæ активонæй архайдта алыхуызон постановкæты. Кæд нырма хæрзæрыгон у, æмæ йæм фæлтæрддзинад бирæ нæй, уæддæр ын ныридæгæн бантыст йæхи равдисынæн, ахъазыд спектакльты дæр. Ирон театры сценæйы зымæджы кæрон æвæрд æрцыди Шекспиры пьесæ «Паддзах Лир». Сæйраг хъайтары кæстæр чызджы фæлгонц дзы сарæзта Алинæ.
Ирон театры студи кæй гом кæнынц, уыцы информаци Алинæйы мад Мырзахъулты Маринæ базыдта социалон хызтæй. Йæ чызгæн æй загъта, æмæ иумæ сфæнд кодтой студийы архайын. Маринæ зæгъы, йæ чызгмæ сабибонтæй фæстæмæ кæй уыдта, актеры дæсныйадмæ тырнындзинад, уый.
Актеры дæсныйады студи кусын райдыдта фарон октябры. Ныртæккæ дзы ис 3 къорды – кæстæртæ, астæуккæгтæ æмæ хистæртæ. Æдæппæтæй 30 сывæллоны. Фæсивæдæн дзы ахуыртæ вæййы æрмæст актеры дæсныйадæй нæ, фæлæ ма хореографийæ, вокалæй æмæ аив дзырды сусæгдзинæдтæ базонынæй. Фыццаг бакастæй ахуыртæ хуымæтæг зынынц. Фæлæ, уый бынтон афтæ нæу. Æрыгон актертæ ам æмбырд кæнынц бирæ зонындзинæдтæ, фенынц цымыдисаг æууæлтæ, сæйрагдæр та фæхайджын вæййынц зындгонд актерты фæлтæрддзинадæй. Студийы педагогтæ сты республикæйы сгуыхт артисттæ. Рæзгæ фæлтæр ам цы бындур сæвæрынц, уымæй бæстæйы бирæ ахуыргæнæндæттæ нæ раппæлдзысты.
Хæрзæрæджы фæсивæд адæмы размæ рахастой класс-концерт. Ахæм хуызы равдыстой, афæдзмæ цæуыл сахуыр сты, уый. Студийы сывæллæттæм æрмæст курдиат раргом кæныныл нæ кусынц, фæлæ ма сæм мадæлон æвзагмæ æмæ культурæмæ уарзондзинад гуырын кæныныл.
