Афтæ фестивалы сæ курдиат æргом кæнынц Тæбæхсæуты Балойы номыл Цæгат Ирыстоны академион театр, стæй сывæллæтты театр «Саби»
Цæгат Ирыстоны дыууæ сфæлдыстадон коллективы архайынц тюркаг адæмты XVI æппæтадæмон фестиваль «Науруз»-ы. Афтæ фестивалы сæ курдиат æргом кæнынц Тæбæхсæуты Балойы номыл Цæгат Ирыстоны академион театр, стæй сывæллæтты театр «Саби». Форум кадджын уавæры байгом Татарстаны сæйраг горæт Хъазаны. Дзæуджыхъæуккаг артисттæ аивадуарзджыты размæ рахастой Шекспиры трагеди «Ричард III». Сæвæрдта йæ театры аивадон разамонæг Уалыты Гиви. Ног цæстæнгас, цымыдисаг сценикон фæзындтытæ, стæй, кæй зæгъын æй хъæуы, Кокайты Тотразы рæсугъд тæлмац ирон æвзагмæ. Сывæллæтты театр «Саби» та равдисдзæн аргъау «Ацæмæзы алæмæты уадзындз». Ацæмæзы æмæ Агуындæйы уарзондзинады рæсугъд истори. Спектаклы фенæн ис дисы фтауæг цаутæ – сæйраг хъайтары цæрдвæндаг. Бæлвырддæр та Нарты Сосланимæ тох, Хурдзаст Сагыл цуан, æмæ зындгонд Нарты хъæзтытæ. Дыууæ спектаклы дæр сты ирон æвзагыл. Ацы аз Хъазаны фестиваль баст у Цæгат Кавказы адæмты театртимæ. Программæйы сты Турчы, Казахстаны, Узбекистаны, Киргизийы æмæ ма Уæрæсейы регионты минæвæрттæ. Фестиваль «Науруз» ацы аз бабæрæг кæндзысты 1000 архайæгæй фылдæр.
