Ныр традицион продуктæн ис нырыккон маркетингы формæ
Цæгат Ирыстоны мыдыкуыстгæнджытæ сæ тыхтæ баиу кодтой кооперативы. Ныр традицион продуктæн ис нырыккон маркетингы формæ. Уымæй уæлдай, иумæйаг тыхтæй æнцондæр у хæрзхъæддзинадыл кусын, стæй базарады аккаг бынат бацахсын. Хорз мыдæн æрмæст мыдыбындзыты фæллой фаг нæу. Хъæуы сын æххуыс кæнын, уыимæ та бизнес парахат кæнын. Куыстуат «Горная пчелка»-йы архайды тыххæй Касаты Наирæйы æрмæг.
Роман Чубинец мыдыбындзыты куыст кæнын райдыдта афæдз æмæ *рдæджы размæ, йе рдхорды амындмæ гæсгæ. Йæ райдианæй дæр æй æмбæрста, йæхи дæр мыдыбындзæй къаддæр фыдæбон кæнын кæй нæ хъæудзæн, уый. Фыццаг бакастæй адæймагмæ фæкæсдзæн, цыма мыды куыст кæнын æнцон у, зæгъгæ. Фæлæ уый афтæ нæу.
Ныр ын мыдыкуыст кæнын у йæ бизнес дæр æмæ йæ уарзон хъуыддаг дæр. Роман у республикæйы фыццаг мыдыкуыстгæнджыты кооператив «Горная пчелка»-йы сæрдар. Куыстуат баиу кодта 4 мыддарæны. Архайынц хуыздæр фæлтæрддзинадæй спайда кæныныл æмæ куыстуарзаг мыдыбындзытæн зæрдæмæдзæугæ уавæртæ скæныныл. Сæ бынæттæ сты нырыккон домæнтæ хынцгæйæ. Сæрдыгон дзы тæвд нæу, зымæгон та сæм у хъарм.
Республикæйы фыццаг кооператив фæзынди инвестицион программæ «Агростартап»-ы æххуысæй. Хæдзарады ныртæккæ ис 500 мыдыбындзыты бинонтæ. Фæндтæ æмæ нысанты сæ ис фæфылдæр кæнын, архайынц мыды куыст апарахат кæныныл. Кæдфæндыдæр сæм ис цæттæ продукци дæр. Зæгъæм, ис сæм урс акъацийы мыд. Пайда у иммунитетæн, æххуыс у ахсæны куысытæн дæр. Нымад у премиум къласы хуызыл. Кооперативы сæ куыстмæ кæсынц бæрнон цæстæй, уыимæ, сфæлдыстадыон æууæлтимæ. Бацæттæ кодтой аив лæвæрттæ дæр. Бакуыстой æмæ дарддæр парахат кæндзысты сæ бизнес.
Кооператив сси рауагъдад фæфылдæр кæнынмæ фыццаг къахдзæф. Стæй ма, иумæйаг тыхтæй хæрзхъæддзинад дæр сисæн ис бæрзонд æмвæзадмæ. Æрмæстæр афтæмæй ис хуыздæрты хсæн аккаг бынат бацахсæн.
