Ацы аз æм бахастой 250 куысты онг
Зындгонд уæрæсейаг режиссер-документалист Цæлыккаты Вадимы киноныв «Мой брат доктор Мольс» хорзæхджынгонд æрцыд 29-æм Æппæтадæмон фестиваль «Сталкер»-ы. Ацы аз æм бахастой 250 куысты онг. Конкурсмæ та равзæрстой 22 кинолентæйы. Цæлыккаты Вадимы документалон ныв дзуры Бельгийы цæрæг бинонтыл. Сты Уæрæсейæ рацæугæ. Кинонывы хъайтартæ сты дыууæ æфсымæры. Хистæр Серж цæры Брюсселы, æмæ кусы дохтырæй. Кæстæр Алексей та у менеджер Мæскуыйы. Киноисæн процесс цыди дыууæ азæй фылдæр. Документалон ныв сæрмагонд дипломæй схорзæхджын кодтой 15-æм Æппæтадæмон кинофестиваль «Русское зарубежье»-йы. Кинонывы премьерæ уыд ацы аз мартъийы Мæскуыйы. Уымæй дарддæр ма йæ сæрмагондæй равдыстой Брюсселы, фæззæджы та Дзæуджыхъæуы кинойы Хæдзары.