Ныр кусæнуаты къордæн æмæ чысыл артисттæн сфæлдыстадон архайд кæнынæн ис æппæт уавæртæ
Црауы бындурон цалцæджы фæстæ йæ дуæрттæ байгом кодта культурæйы хæдзар. Ныр кусæнуаты къордæн æмæ чысыл артисттæн сфæлдыстадон архайд кæнынæн ис æппæт уавæртæ. Куыстытæ æххæстгонд æрцыдысты, национ проект «Культурæ»-мæ гæсгæ. Бынæттон бюджетæй та сæхгæдтой, хъæддзаума баивыны хæрдзтæ. Культурон артдзæсты ног уавæрты тыххæй радзурдзæн Хъайтмазты Дзерассæ.
Афтæ Црауы культурæйы хæдзар райдыдта йæ куыст бындурон цалцæджы фæстæ. Культурæйы министр Галазты Эдуардæн бæстыхайы экскурси сарæзта Алагиры районы профилон управленийы хицау Дзугкойты Дзамболат. Йæ ныхæстæм гæсгæ, куыстытæ æххæстгонд æрцыдысты нацпроект «Культурæ»-мæ гæсгæ, хъæддзаумайæн та фæрæзтæ радих кодтой бынæттон бюджетæй.
Дзугкойты Дзамболат, Алагиры районы администрацийы культурæйы управленийы хицау: «Афæдзы дæргъы куыстытæ æххæст кодтой ам. Алцыдæр тынг хорз у. Ныр ма дзы кусын хъæудзæн. Кусгæ дæр кæнынц, ис сæм къордтæ – 10 къорды».
Ацы культурæйы хæдзар Алагиры районы у раззагдæртæй иу. Цалцæджы рæстæг сног кодтой бæстыхайы сæр, пъолтæ, хъармгæнæн системæ. Ныр объект хъарм кæны тыхджын пец. Сæвæрдтой видеоцæстдарды системæ æмæ зынгхуыссынгæнæн сигнализаци. Баивтой рудзгуытæ æмæ дуæрттæ. Культурæйы хæдзары директор Цакъоты Заремæ куыд зæгъы, афтæмæй хатдзæгтæй разы сты. Аразджытæ куыстой, къорды фæндонтæ хынцгæйæ. Ныр сывæллæтты æмæ хистæрты сфæлдыстадон архайд кæнынæн ницыуал хъыгдардзæн.
Цакъоты Заремæ, Црауы культурæйы хæдзары директор: «Нырмæ нæм цы нæ уыд, уый нæм фæзынд. Фыццаджыдæр, уазæгдон. Уыдис æддейы, сывæллæтты-иу уырдæм цæуын. Раздæр-иу ам уыд тынг уазал. Сывæллæттæ æмæ кусджытæ рынчын кодтой. Уый нæ тынг тыхсын кодта. Ныр нæ хъармгæнæн системæ иууылдæр у тынг хорз. Цин кæнæм. Ацы проектмæ бар чи дардта, уыдонæн стыр бузныг се *ппæтæн дæр».
Базылдысты, инструменттæ æмæ костюмтæ кæм дарынц, уыцы агъуыстмæ дæр. Инвентарæн – хицæн тæрхæджытæ. Чысыл артисттæн фæзынд ног костюмтæ дæр.
Сног кодтой зал дæр. Ис дзы 300 бынаты онг. Сценæйы сæ аивад æвдисынц бынæттон сфæлдыстадон къордтæ. Культурæйы министры ныхæстæм гæсгæ, ныр ацы фæз нысан кæндзысты стыр гастрольтæн.
Галазты Эдуард, РЦИ-А культурæйы министр: «Нæ бон цы уа, уымæй баххуыс кæндзыстæм. Чингуытæй, дзаумæттæй, инструменттæй кæд æххуыс бахъæуа, æмæ, æвæццæгæн, бахъæудзæн, уæд сæ цуры уыдзыстæм мах дæр. Ардæм хондзыстæм нæ профессионалон къордты. Æмæ адæмæн дæр æхсызгон уыдзæн уыцы хабар. Цас фылдæр уа ахæм галуантæ, уыйбæрц хæстæгдæр уыдзыстæм хъæуы чи цæры, уыцы адæммæ».
Культурæйы хæдзары дыккаг уæладзыджы байгом кодтой библиотекæ. Холлы сæвæрдтой кæсынæн стъолтæ. Фæхъæздыгдæр чингуыты фонд дæр. Ис дзы бирæ национ литературæ, сæ хыгъды ирон æвзагыл дæр. Культурæйы хæдзар та сси хъæуы цæрджыты уарзондæр бынæттæй иу.
