Цы хатдзæгтæ скодтой, æмæ сæм цы фиппаинæгтæ æрхастой, уыдон арвитдзысты бæрнон структурæтæм.
Æппæтуæрæсеон адæмон фронты активисттæ, радон мониторинг кæнгæйæ, бабæрæг кодтой 3 медицинон объекты: Хæтæлдоны, Дæллаг Санибайы æмæ Михайловскæйы. Цы хатдзæгтæ скодтой, æмæ сæм цы фиппаинæгтæ æрхастой, уыдон арвитдзысты бæрнон структурæтæм. Æхсæнадон кусджытæ ма нысан кæнынц 7 фельдшерон-акушерон пункты æмæ амбулаторийы бабæрæг кæнын. Се ппæт дæр арæзт цæуынц республикæйы районты æмæ хохаг хъæуты. Фидараты Маринæ радзурдзæн бæлвырддæр хабæрттæ.
Хæтæлдоны фельдшерон-акушерон пункт байгом кодтой ивгъуыд азы кæрон. Йæ куысты фыццаг бонты йæ бабæрæг кодтой цалдæр рынчыны. Сæ фылдæры тыхсын кодта туджы бæрзонд æлхъывдад. Уыдонæн баххуыс кæнынæн ам ис æппæт хъæугæ препараттæ. Фæлæ æххæстæй медицинон объект сифтонг кæндзысты январы кæронмæ. Фельдшерон-акушерон пункт лæггад кæны, 700 адæймаджы кæм ис, ахæм хъæуæн. Алцыдæр хорз, фæлæ цух æййафынц медицинон кусджытæй.
Æппæтуæрæсеон адæмон фронты активисттæ сбæрæг кодтой ног куыстуаты архайд. Сæ хатдзæгтæм гæсгæ, объекты нæ фаг кæнынц медицинон препараттæ. Стæй ма арæзтады проектмæ дæр æрхастой фиппаинæгтæ. Бæлвырддæр та дзы нæй фæндаг. Афтæмæй пациенттæн ног бæстыхаймæ зын бацæуæн у.
Дæллаг Санибайы та ныртæккæ цæуы ног фельдшерон-акушерон пункты арæзтад. Йæ фæзуат у стыр – 218 квадратон метры. Ныртæккæ куыстытæ цæуынц мидæгæй. Уæвгæ та арæзтад райдыдта мæй æмæ рдæджы размæ. Иу уыйбæрц ма, æмæ объект фæнд кæнынц байгом кæнын. Дæллаг Санибайы цæры 1700 адæймаджы. Фельдшерон-акушерон пункт сын у æнæмæнг хъæугæ. Проектмæ гæсгæ нысан кæнынц инфекцион блокы палатæтæ скæнын дæр. Куыстытæм йæ цæст дары хъæуы разамынд. Разы у, арæзтадон бригады профессионалон архайдæй.
Михайловскæйы зæронд амбулаторийы бынаты та ныртæккæ аразынц ног. Куыстытæ цæуынц программæ «Регионы рæзтмæ» гæсгæ. Раздæры бæстыхай уыд кæлæддзаг уавæры. Ног объекты арæзтад та райдыдта ивгъуыд азы ноябры. Куыстытæ фæуынмæ хъавынц апрелы. Ног амбулатори арæзт цæуы хъæуы астæу. Уый хъæуы цæрджытæн у тынг æхсызгон, уыдоны нымæц та у 11 мин адæймаджы.
Æппæтуæрæсеон адæмон фронты регионалон хайады минæвæрттæ, сæрмагонд мониторинг кæнгæйæ, бабæрæг кодтой æртæ медицинон объекты. Фиппаинæгтæ кæмæ æрхастой, уыдоны тыххæй та æхсæнадон кусджытæ сæ хъуыдытæ барвитдзысты бæрнон структурæтæм. Фылдæр хауы Хæтæлдоны фельдшерон-акушерон пунктмæ.
Иннæ дыууæ объекты арæзтад та æхсæнадон кусджытæ банымадтой иттæг хорзыл. Раппæлинаг у куыстыты тагъд цыд, æмæ проекттæ стандарттæм гæсгæ арæзт кæй не рцыдысты, уый дæр. Адæмон фронты активисттæ ма нысан кæнынц 7 фельдшерон-акушерон пункты æмæ амбулаторийы бабæрæг кæнын. Се ппæт дæр арæзт цæуынц республикæйы районты æмæ хохаг хъæуты.
