Уый фæрцы, онкологийæ рынчын адæмы æндæр республикæтæм цæуын нал хъæудзæн диагностикæ скæнынмæ
Дзæуджыхъæуы байгом ядерон медицинæйы центр. Уый фæрцы, онкологийæ рынчын адæмы æндæр республикæтæм цæуын нал хъæудзæн диагностикæ скæнынмæ. Ногдзинад фадат ратдзæн, низ йæ тæккæ райдианы рабæрæг кæнынæн. Раздæр иу ахæм процедурæ скæнынмæ рынчынтæ цыдысты Ростовмæ. Ныр сын фадат уыдзæнис лæвар хæрзхъæд медицинон лæггæдтæ райсынæн.
Кæд ныронг адæймаджы низы хъæд бæрæг кодтой МРТ æмæ КТ уæд, уырыссагау позитронно-эмиссионный томографи кæй хонынц, уый та ноджы лыстæгдæр æмæ тагъддæр æвзары алы низы хъæд.
Онкологон низ раиртасынæн амонынц ацы кусæнгарз. Раздæр сæ æрвыстой Стъарапъол, Ростов æмæ Мæскуымæ. Фæлæ бирæтæн ахæм фæндаг вæййы уæззау. Æмæ ныр Цæгат Ирыстоны дæр байгом ядерон медицинæйы центр «ПЭТ-Технолоджы».
Мидæгæй алцы дæр лæмбынæгæй хъуыды гонд. Райдай бацæуæнæй æмæ суанг рынчынимæ чи ис, уый томографийы рæстæг кæм банхъæлмæ кæсдзæн, ахæм агъуыст
Процедурæ скæнынмæ венæты бауыдзынц сæрмагонд раствор, кæцы уыргтæй рацæуы, уымæ гæсгæ ахæм процедурæ кæнæн ис афæдз 4-5 хатты. Кæнæн æй ис сывæллæттæн дæр. Препарат ласдзысты Стъарапъолæй.
Центрмæ препарат æрбаласынц сæрмагонд контейнеры. Йæ хуылфы ис мультидозæимæ капсулæ. Фаг кæны 15-20 иртасæн куыстæн. Цы хуызист райсынц уый та фадат дæтты раиртасын адæймаджы буары ног къуыбæрттæ кæм фæзындысты, стæй цас тæссаг сты æмæ уидæгтæ ауагъта æви нæ, уый. Уимæ ма иртæсты фæрцы сбæрæг кæнын дзæбæх кæныны схемæ.
Центры æппæт рынчынтæ æххуыс исдзысты паддзахадон гарантиты территориалон программæйы фæлгæты лæвар – онкологон центры амындмæ гæсгæ. Специалисттæ ацыдысты æнæмæнг хъæугæ ахуыртæ æмæ райстой сертификаттæ. Сæ куысты хатдзæгтæм ма кæсдзысты Стъарапъолы эксперттæ.
Компаниты къорд «МедИнвестГрупп» проектмæ бахаста 300 милуан сомы. Æдæппæтæй центр афæдзмæ балæггад кæндзæн 600 рынчынæн
