Амыдта йæ Цæгат Ирыстоны сæргълæууæг Битарты Вячеслав.
Медицинон кадртæ цæттæ кæныны фарстайыл æрдзырдтой Райрæзты Агентады проектон офисы æмбырды. Амыдта йæ Цæгат Ирыстоны сæргълæууæг Битарты Вячеслав. Æнæниздзинадхъахъхъæнынады министр Годжысаты Тамерлан бахаста фæндон, цæмæй царды рауадзой проект «Здравствуйте, я ваш доктор». Йæ фæрцы терапевттæ æмæ педиатртæ зилдзысты адæмыл, æмæ сын бæрæг кæндзысты се нæниздзинад. Уый руаджы фæхуыздæр уыдзæнис фыццаградон медицинон æххуыс ракæныны хæрзхъæддзинад. Стыр ахадындзинад ис адæмимæ бастдзинадæн дæр. Республикæйы сæргълæууæг бæрнон ведомствотæн бабар кодта, цæмæй саразой участокты чи кусы, уыцы дохтырты куысты бæрæггæнæнты фæтк. Профилон министрад та бакусдзæнис медицинон кусджыты аттестацийы фарстатыл. Æмбырды архайджытæ ма æрныхас кодтой, нæ республикæйы 2019-æм азæй фæстæмæ цы программæ æххæстгонд цæуы, ууыл. Цæгат Ирыстоны райрæзты агентады разамонæджы хæстæ æххæстгæнæг Туаты Ирмæ куыд фехъусын кодта, афтæмæй коронавирусы инфекци парахат кæныны аххосæй, рæстæгмæ æрлæууыди æрыгон медикты стажировкæмæ æрвитыны куыст. Фæлæ хæстæгдæр рæстæг нысан кæнынц ахуырадон вебинар саразын республикæйы æнæниздзинадхъахъхъæнынады разамындимæ. Онлайн-лекцитæ саразынмæ цæттæ сты «Экономикæйы Уæлдæр скъолайы» специалисттæ.
