Уый уыдзæн фыццаг Цæгат Кавказы, æмæ дыккаг – Уæрæсейы
Нæ республикæйы территорийы, гæнæн ис, æмæ фæзындзæн геопарк. Уый уыдзæн фыццаг Цæгат Кавказы, æмæ дыккаг – Уæрæсейы.
Ахæм хъæппæрис 9-æм наукон-практикон конференцийы фехъусын кодта ЮНЕСКОйы геонаукæты æмæ геопаркты Æппæтадæмон программæйы разамонæг Кристоф Ванденберг. Конференци баст у хæххон территориты рæзтимæ. Специалист сæрмагондæй ссыд Францийæ Цæгат Ирыстонмæ, цæмæй йæхæдæг базонгæ уа бынæттон æрдзон уавæртимæ æмæ радзура йæ фæлтæрддзинады тыххæй, ахæм фæзтæ куыд кусынц, уый тыххæй. Фæсарæйнаг уазæг куыд загъта, афтæмæй объектæн ЮНЕСКОйы статус куы уа, уæд уый фадат дæтты экономикон рæзтыл кусынæн æмæ йæм туристты ргом здахынæн. Ахæм объектты фæрцы уыцы-иу рæстæг иртæст цæуынц геологон объекттæ дæр. Специалист ма загъта, ахæм парк саразынæн æппынкъаддæр хъæуы 4 азы. Уый размæ та хъæуы æппæтадæмон экспертты разыдзинад райсын. Уымæ гæсгæ Ирыстонæн ацы фарстайы ис хорз фидæн. Фыццаджыдæр – йæ географион ран. Дыккаджы та цымыдисдзинад æвзæрын кæнынц 70 объектæй фылдæр.
Кристоф Ванденберг, ЮНЕСКОйы геонаукæты æмæ геопаркты Æппæтадæмон программæйы разамонæг: «Хъуыддаг афтæ у, æмæ геопаркты территорийы ис, хъахъхъæнын кæй хъæуы, ахæм объекттæ. Фæлæ æрмæст уыдон нæ хъахъхъæнæм. Стыр æргом здахæм экономикон рæзтмæ. Зонæм уый дæр, æмæ фæсивæд хæххон районтæй тырнынц горæттæм, уымæн æмæ сын хохы куысты бынæттæ нæ фаг кæнынц. Ацы геопаркты фæрцы та фæзынынц ног объекттæ, æмæ ног куысты бынæттæ. Афтæмæй рæзы регионы экономикæ дæр».
