Фенæн дзы уыдзæн чысыл, ирд æмæ зæрдæмæдзæугæ экспонаттæ.
Азнавур Мкртчаны «Фантазиты дуне». Абон Национ музейы байгом уыдзæн æрыгон æрмдæсныйы куыстыты равдыст. Фенæн дзы уыдзæн чысыл, ирд æмæ зæрдæмæдзæугæ экспонаттæ. Конд сты пластилинæй. Се ппæт дæр сты зонгæ: чи мультипликацион нывтæй ист, кæнæ алыхуызон наутæ, стæй дунейы архитектурæйы шедевртæ. Ахæм равдыст алы аз дæр сæ хъомылгæнинагæн бацæттæ кæнынц хæрзаудæн фонд «Æххуысы къух»-ы минæвæрттæ. 4 азы размæ Азнавурæн йæ сæрæн скодтой уæззау операци. Уæвгæ та, æрыгон лæппу пластилинæй архайын бауарзта 5-аздзыдæй. Йæ коллекцийы ис аргъуантæ, фидæрттæ, фонтантæ æмæ ма суанг æнæхъæн горæттæ. Райдыдта та хуымæтæг мультфильмты хъайтартæй. Ныртæккæ та аразы зындæр композицитæ. Курдиатджын лæппу йæ куыстытимæ уыд фæсарæнты Дубайы æмæ Италийы. Азнавур у Дзæуджыхъæуы педагогон колледжы аивадон хайады студент. Архайы алыхуызон уæрæсейаг æмæ фæсарæйнаг равдыстыты, сси алы премиты лауреат æмæ кады гæххæттыты хицау. Æрыгон скульпторы бæллиц у æлыгæй кусын райдайын, æмæ йе сфæлдыстадон хъæппæристæ царды уадзын. Кæй зæгъын æй хъæуы, йæ фидæны дæсныйадæн та равзæрста архитектурæ.
