Мæздæггаг нывгæнæджы экспозицимæ хаст æрцыдысты йæ хуыздæр нывтæ
Ахæм сæргондимæ Национ наукон библиотекæйы байгом Юрий Побережныйы куыстыты равдыст «Бакæсæм кæрæдзийы цæстытæм…». Мæздæггаг нывгæнæджы экспозицимæ хаст æрцыдысты йæ хуыздæр нывтæ. Уæрæсейы нывгæнджыты цæдисы уæнг, Графикæйы Æппæтадæмон Академийы уæнг нывкæнынады алы жанрты кусын райдыдта 1994-æм азы. Стъарапойлаг аивадон скъолайы зындгонддæр минæвары нывтæ фылдæр сты сау æмæ урс ахорæнтæй конд. Фæлæ дисы фтауынц сæ ирд фантазийæ. Юрий Побережныйы графикон сыфтыл фæзынынц йæ авторон цæстæнгасы дыууæ къæпхæны. Иу — хистæры мидбылхудт, иннæ та — йæ сабибонты мысинæгтæ. Иу дзырдæй — хицæн дуне. Нывгæнæджы æппæт куыстытæ иу кæны уарзондзинады темæ. Уарзондзинад йæ райгуырæн горæтмæ, фыдыуæзæгмæ, рагон аргъуантæм, мæсгуытæм, хæхтæм. Йæ графикæйæн аргъ скодтой æппæтадæмон æмвæзадыл. Нывгæнæджы куыстытæ сты хи коллекциты Уæрæсейы, Украинæйы, Польшæйы, Германийы æмæ Америкæйы Иугонд штатты.
