Ацы аз мадзалы архайын бафæндыд 700 скъоладзауы куыд горæты, афтæ республикæйы районтæй дæр
Сбæрæг сты хуыздæртæ. Æртыккаг хатт хатдзæгтæ скодтой сфæлдыстадон конкурсæн «Ирыстон мæ зæрдæйы». Проекты сæйраг нысан у мадæлон æвзаджы райрæзтыл кусын æмæ курдиатджын фæсивæды рабæрæг кæнын. Куыстытæн аргъ кодтой æртæ номинацимæ гæсгæ: «Мадæлон æвзагыл фыст хуыздæр эссе», «Хуыздæр хи фыст æмдзæвгæ æмæ нывæцæн», стæй «Хуыздæр ныв». Ацы аз мадзалы архайын бафæндыд 700 скъоладзауы куыд горæты, афтæ республикæйы районтæй дæр. Радон конкурсы темæ баст уыд Хетæгкаты Къостайы райгуырды 160 азы бонимæ. Æрвылаз мадзал арæзт æрцæуы хæрзаудæн фонд «Фарн» æмæ Паддзахадон Думæйы депутат Мæхъиты Зурабы хъæппæрисæй. Куыд алы хатт, афтæ та ныр дæр Мæхъиты Зураб байхъуыста финалисттæм æмæ сын радта кады гæххæттытæ æмæ лæвæрттæ. Куыстытæн аргъ кодтой газет «Рæстдзинад»-ы журналисттæ Габуаты Галинæ æмæ Гасанты Валерий. Мадзалы кæй ахуыргæнинæгтæ архайдтой, уыдон та арфæ ракодтой Мæхъиты Зурабæн, мадæлон æвзаг бахъахъæнынмæ æвæрæн кæй хæссы, уый тыххæй.
