Экономикæйы къабазы егъаудæр æмæ ахсджиагдæр мадзæлттæй иумæ нæ республикæ бацæттæ кодта 34 проекты
Цæгат Ирыстоны делегаци архайдзæн инвестицион форум «Сочи-2020»-æмы. Экономикæйы къабазы егъаудæр æмæ ахсджиагдæр мадзæлттæй иумæ нæ республикæ бацæттæ кодта 34 проекты, æмæ сын Сочийы презентаци скæндзысты лайт-боксты æмæ видероликты фæрцы. Делегаттæ инвестицион проекттæ равдисдзысты: туризмы, рухсгæнæн техникæйы продукци уадзыны, хъæууонхæдзарадон машинæтæ аразыны, агротехнологон комплексы, дыргътæ æмæ халсартæ зайын кæныны, кæсаг дарыны, арæзтадон æрмæджытæ уадзыны, æмæ æндæр къабæзты. Уый тыххæй фехъусын кодта экономикон рæзты министры хæдивæг Дзоблаты Зураб. Куыд загъта, афтæмæй бæстон æрлæудзысты 8 проектыл. Фыццаджыдæр уыдзысты туризм æмæ бальнеологи, хъæууон хæдзарад æмæ промышленность. Нæ республикæйы хъæууонхæдзарадон зæххытæ бирæ кæй нæй, уымæ гæсгæ фылдæр æргом здæхт цæуы, ахадгæдæр чи у, ахæм культурæтæ зайын кæнымæ. Уæрæсейаг инвестицион форум Сочийы цæудзæн 12-æмæй – 14-æм февралы онг.
