Кинолентæ «Выжить нельзя погибнуть» тох кæны «аивадон кинонывы» номинацийы хуыздæр уæвыныл
Режиссер Цæлыккаты-Битарты Ангелинæйы киноныв Хуссар Ирыстоны 2008-æм азы цауты фæдыл сси æппæтадæмон патриотон кинойы фестиваль «Защитники Отечества»-йы финалист. Кинолентæ «Выжить нельзя погибнуть» тох кæны «аивадон кинонывы» номинацийы хуыздæр уæвыныл. Конкурсы кæронбæттæн къæпхæн пандемийæйы аххосæй ацæудзæн онлайн-бастдзинады хуызы августы кæрон. Уæ зæрдыл уын æй лæууын кæнæм, кино систой ивгъуыд азы сæрды. Сюжеты хъайтар æрыгон æмæ æнтыстджын ахуыргонд 2008-æм азы сфæнд кодта Мæскуыйы йæ куыст ныууадзын æмæ йæ райгуырæн бæстæ бахъахъхъæнын. Кинофестиваль цæуы Татарстаны. Уæрæсейæ фæстæмæ ма дзы сæ куыстытæ адæмы размæ рахастой Казахстаны, Белоруссийы, Украинæйы, Ираны, Сербийы, Молдавийы, Испанийы æмæ Францийы сфæлдыстадон къордтæ.
